ZAJ NYEEM HNUB TIM 21 LUB 8 HLI 2024
HNUB NCO TXOG LEEJ NTSHIAB VAJ QHIA PIS YUS KAUM
COV LUS NYOB HAUV MAS TAIS NTAWV MOO ZOO (MT 20: 1-16)
Kwv tij Hmoob sawv daws, thaum nej hnov Huab Tais Yes Xus zaj paj lug no mas nej xav li cas? Nej puas xav tias ua cas tus tswv teb txiv cawv ua tsis ncaj rau cov tub zog? Ua cas nws muab nqe zog rau cov tuaj tom qab ib yam li cov xub tuaj ua ntej, cov tuaj puag ntxov mas lawv ua hauj lwm thawm hnub hos cov tuaj tom qab ua ib teev xwb; lawv tau nqe zog ntau ib yam li cov ua hauj lwm 8 teev diam?
Muab xav raws li neeg ntiaj teb xav mas tus tswv teb ua tsis ncaj tiag! Nej puas xav li ntawd.
Yog kawg cov kwv tij Hmoob, yog peb xav li neeg xav mas peb yuav xav li ntawd tiag. Tab sis Huab Tais Tswv Ntuj tsis xav raws li neeg xav. Huab Tais Yes Xus los nws kuj tsis xav li peb xav thiab.
Huab Tais Yes Xus xav qhia tias Huab Tais Tswv Ntuj lub siab ncaj zoo li cas, Huab Tais Tswv Ntuj txoj kev ncaj yeej xub nyob ua ntej yuav muaj neeg lawm, Huab Tais Tswv Ntuj yeej ua ncaj rau sawv daws ib yam nkaus, thiab Huab Tais Tswv Ntuj yeej hlub neeg zoo tib yam, nws tsis xaiv hlub tus no tseg tus tod.
Txawm tus hlob tus yau, tus muaj tus pluag, tus txawj ntse los tus ruam, tus xub paub Huab Tais Tswv Ntuj los tus nyuam qhuav paub, tus ib txwm ntseeg los tus ntseeg tom qab; Huab Tais Tswv Ntuj yeej yuav pub rau sawv daws sib luag, tsuav yog tus ntawd tau leg qav leg num rau Huab Tais Tswv Ntuj xwb. Li ntawd, cov neeg ntseeg tsis txhob hais rau cov tsis ntseeg tias Huab Tais Tswv Ntuj tsis hlub koj; cov ntseeg ntev ntseeg ruaj tsis txhob khib cov ntseeg tshiab tau txais txiaj ntsim paj tshab ntawm Tswv Ntuj. Tsim nyog cov neeg ntseeg yuav nrog cov tsis ntseeg los cog ntseeg tshiab zoo siab thaum lawv pom tias Huab Tais Tswv Ntuj pom lawv.
Cov neeg ntseeg tsis hais ntseeg ntev ntseeg luv sawv daws kuj yuav sib pab tsim Ntuj lub Ceeb Tsheej nyob hauv lawv lub neej. Tsis muaj qhov tias ntxov los lig. Tsuas muaj qhov tias thaum koj hnov Huab Tais Yes Xus hu koj los pab leg hauj lwm rau Tswv Ntuj, los pab tsim kev thaj yeeb, kev haum xeeb, kev sis nyiam sis hlub; es koj yuav teb los tsis teb Huab Tais Yes Xus, koj yuav ua los tsis ua xwb.
