ZAJ NYEEM HNUB TIM 21 LUB 5 HLIS 2024
HNUB NCO TXOG LEEJ NTSHIAB MAS NKAS LEES
COV LUS NYOB HAUV MAS KOS NTAWV MOO ZOO (MK 9: 30-37)
Cov kwv tij Hmoob sawv daws, lub xyoo teev Ntuj xyoo no rov coj peb los txog lub caij Nyob Nruab Xyoo ntu 2. Nyob hauv ib lub xyoos twg, mas peb yuav pib lub xyoo teev Ntuj ntawm lub caij Tos Huab Tais, mus rau lub caij Huab Tais Yug Los, lub caij Nyob Nruab Xyoo ntu ib, lub caij Plaub Caug, lub caij Hla, ces mam rov los poob rau lub caij Nyob Nruab Xyoo ntu 2.
Lub caij Nyob Nruab Xyoo muaj 34 lub Lis Piam. 9 lub Lis Piam ua ntej mas peb nyeem lub Moo Zoo raws li Leej Ntshiab Mas Kos sau tseg. Tom qab ntawd mam yog Mas Tais Ntawv Moo Zoo thiab Lus Kas Ntawv Moo Zoo.
Hnub no yog Hnub Peb hauv lub Lis Piam 7 caij Nyob Nruab Xyoo, kuj ncaj rau hnub nco txog Leej Ntshiab Mas Nkas Lees. Nws yog ib tug Txiv Plig Mev Xis Kos tuag ua tim khawv nyob hauv xyoo 1927. Xyoo 2000 lub Koom Txoos tsa nws ua ib tug Leej Ntshiab.
Cov kwv tij Hmoob, hnub no Mas Kos piav rau peb tias Huab Tais Yes Xus qhia cov thwj tim txog nws txoj kev tuag thiab sawv rov los, tab sis cov thwj tim tsis to taub txog cov lus ntawd. Mas Kos xav qhia peb sawv daws tias Huab Tais Yes Xus cov thwj tim tsis xav hnov txog tej ntawd, lawv tsuas ib siab mus rau ntiaj teb neeg fab hwj chim xwb; nyias xav ua tus loj, ua tus hau coj sawv daws.
Ntawm Huab Tais Yes Xus, tus neeg yuav tau txais lub hwj chim mas yog tus yeem nrog Huab Tais Yes Xus ris ntoo cuam, nws zoo siab ua tus me tsob hwb luag tej.
Cov kwv tij Hmoob sawv daws, peb yuav raws Huab Tais Yes Xus qab, ua Huab Tais Yes Xus thwj tim tau, mas thawj kauj ruam yog peb yuav tau ‘yeem’ ua tus me.
