ZAJ NYEEM HNUB TIM 20 LUB 6 HLI 2024
HNUB TSIB LUB LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 6: 7-15)
Kwv tij Hmoob sawv daws, Huab Tais Yes Xus hais tias thaum nej teev ntuj, nej txhob ntuas mus ntuas los, tab sis nej yuav thov Tswv Ntuj lub Ceeb Tsheej kom tuaj txog nej, nej yuav thov Tswv Ntuj hlub nej thiab khuv leej nej. Thaum nej thov yam twg ntawm Tswv Ntuj mas nej yuav ua yam nej thov ntawd rau lwm tus thiab, ces Huab Tais Yes Xus thiaj qhia zaj ‘Peb Txiv’ rau cov thwj tim.
Kwv tij Hmoob, thaum peb hais zaj Peb Txiv mas peb tsis yog lam hais ntawm ncauj xws li tej me noog qog neeg lus, tab sis thaum peb hais zaj Peb Txiv mas peb yuav hais tawm hauv nruab siab tuaj. Peb hais mas peb yuav xav raws li lo lus peb hais ntawd. Peb hu Tswv Ntuj ua ‘Txiv’ mas txhais tias Tswv Ntuj hlub peb thiab yuav pub txhua yam zoo rau peb xws li ib leej txiv pub qhov zoo rau nws cov me nyuam. Peb hais tias koj lub Ceeb Tsheej los txog, kom muaj raws li koj nyiam nyob ntiaj teb no li nyob saum ntuj, mas yog peb tab tom xav kom tas lub ntiaj teb muaj kev thaj yeeb, ces peb kuj yuav yog tus tsim kev thaj yeeb mas Tswv Ntuj lub Ceeb Tsheej thiaj los txog. Peb hais tias thov koj pub mov txaus peb noj hnub no, mas peb kuj yuav rov ntuas peb kom txhob muaj lub siab ntshaw ntau dhau, peb yuav pub yam peb muaj rau tus tsis muaj. Peb hais tias koj zam peb cov nuj nqis mas saib peb puas zam rau tus tshuav nqi ntawm peb; peb zam mas Tswv Ntuj thiaj zam rau peb.
Peb hais tias Tswv Ntuj koj txhob tso peb raug kev ntxias, koj npo peb ntawm kev phem; peb hais li ntawd, tab sis hnub no peb puas yeem cia Tswv Ntuj ua tus pab peb mas. Zoo li tus neeg poob dej, thaum luag cev ib tug pas los rau nws tuav kom txhob tog, tab sis nws tsis nco txog, nws ntaug tes ntaug taw tsis feeb meej tias tsum tuav tus pas los tus ceg luag cev tuaj ntawd.
Kwv tij Hmoob sawv daws, txhua yam peb thov ntawm Tswv Ntuj mas tsis muaj dab tsi yuav muaj nqes thiab loj cuag cov lus nyob hauv zaj Peb Txiv no.
Nej khaws coj mus xav mog. Nyob zoo sawv daws.
