ZAJ NYEEM HNUB TIM 20 LUB 5 HLIS 2024
HNUB NCO TXOG KOOM TXOOS LEEJ NIAM
COV LUS NYOB HAUV ZAM NTAWV MOO ZOO (ZM 19: 25-34)
Cov kwv tij Hmoob, nyob hauv xyoo 1981 lub 5 hlis tim 13, Vaj Qhia Zam Paj Lug 2 raug tua tab sis nws tsis tuag. Vaj Qhia xav tias tos nws tsis tuag mas yog muaj niam Mab Liab ua tus pov hwm nws, ces Vaj Qhia Zam Paj Lug 2 tau hais kom cov kab xwm hauv Vas Tis Kas coj niam Mab Liab daim duab tab tom puag tus me nyuam Yes Xus los dai ntawm Vaj Qhia lub tsev sab phab ntsa, thiab muab npe rau daim duab no tias ‘Koom Txoos Leej Niam’ (Mater Ecclesiae).
Xyoo 2018 Vaj Qhia Fas Ntshis Kus hais kom tshwj Hnub Ob tom qab hnub hwm Leej Ntuj Plig nqes los cia ua hnub nco txog Koom Txoos Leej Niam. Xyoo no, yog ncaj rau hnub no. Hnub tim 20 lub 5 hlis.
Ua cas lub Koom Txoos thiaj saib niam Mab Liab yog Koom Txoos Leej Niam, vim tias niam Mab Liab yog tus xeeb Huab Tais Yes Xus thiab niam Mab Liab yeem cia nws Leej Tub tuag zaum Ntoo Cuam kom tau txhiv tas ntiaj teb neeg, niam Mab Liab tseem niaj hnub muab siab rau pab tsoom neeg vam txog nws.
Lub Moo Zoo hauv hnub no, peb thiaj pom tias thaum Huab Tais Yes Xus dai saum tus Ntoo Cuam yuav tuag tsis tuag ntawd, niam Mab Liab nyob rawv hauv qab Ntoo Cuam, niam Mab Liab koom nrog nws Leej Tub ris kev txom nyem, niam Mab Liab ntseeg tias nws Leej Tub txoj kev txom nyem no yuav pab cawm tas lub ntiaj teb.
Niam Mab Liab hais ib lo lus rau niam Mab Liab tias “Niad, kuv tus thwj tim nyob ntawm koj ib sab ko, mas txij hnub no mus nws yuav yog koj tus me nyuam.”
Huab Tais Yes Xus lo lus no, yog nws tab tom muab nws niam los ua peb sawv daws niam, los ua lub Koom Txoos Leej Niam. Huab Tais Yes Xus kuj tau tsa peb sawv daws los koom ua ib cuab nrog nws, koom tib leej niam nrog nws. Li ntawd, peb sawv daws thiaj tau ua Huab Tais Yes Xus cov kwv, cov muam.
Cov kwv tij Hmoob, txhua hnub mas peb thiaj yuav vam txog peb niam, yog niam Mab Liab pab thov Ntuj rau peb thiab pab nres peb.
