HNUB TIM 20 LUB 11 HLIS; HNUB PLAUB LUB LIS PIAM 33 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 19: 11-28)
Kwv tij Hmoob sawv daws, Huab Tais Yes Xus muab nws piv rau tus neeg tawm rooj mus txais lub hwj chim vaj ntxwv, nws muab nyiaj choj rau cov tub txib coj mus ua luam, ces tom qab nws rov los txog nws mam txheeb cov choj nyiaj saib cov tub txib coj mus ntxeev tau li cas.
Kwv tij Hmoob, cov tub txib yog peb tsoom neeg sawv daws, Huab Tais Yes Xus muab ib txoj hauj lwm rau peb ua.
Txoj hauj lwm Huab Tais Yes Xus muab rau peb, yog tsim Tswv Ntuj lub Ceeb Tsheej nyob hauv peb lub neej; yam li kev sis nyiam sis hlub, kev sib pab, kev sib nres.
Kwv tij Hmoob, Huab Tais Yes Xus tsis saib tias peb sawv daws yuav tsum tsim Tswv Ntuj lub Ceeb Tsheej tau sib luag zos, yam li tus tswv nyiaj tsis saib tias nws cov tub txib yuav tsum coj cov nyiaj mus ua luam kom tau paj ntau tib yam.
Qhov Huab Tais Yes Xus saib mas yog; saib peb puas muab siab rau tsim Tswv Ntuj lub Ceeb Tsheej.
Tus muaj laj lim ntau mas nws tsim tau ntau, tus muaj laj lim tsawg mas nws tsim tau tsawg. Tus tsim tsis tau li mas tsis yog nws tsis muaj laj lim los tswv yim, tab sis vim nws tub nkeeg, nws ntshai tsim Tswv Ntuj lub Ceeb Tsheej; yam li nws tsis kam tawm mus ua cov hauj lwm nyiam thiab hlub lwm tus, nws tsis kam txo lub hwj chim mus tsob hwb lwm tus, nws qias dub tsis kam qee yam nws muaj pub rau cov tsis muaj.
Tus neeg zoo li no, mas hnub Huab Tais Yes Xus rov qab los, Huab Tais Yes Xus yuav hais rau nws tias “Ua cas koj yuav phem ua luaj no. Vim li cas koj tsis tsim kuv lub Ceeb Tsheej nyob hauv koj lub neej.”
Kwv tij Hmoob sawv daws, peb yuav tsis txhob nco txog peb ntiag tug xwb, tab sis peb tsum xub xauj kom pom txog lwm tus ua ntej tso, mas peb thiaj yuav nyiam tau luag, hlub luag, tsob hwb luag, pab luag. Peb ua li no mas thiaj yuav coj tau Huab Tais Yes Xus cov choj nyiaj mus ntxeev tau paj rau Huab Tais Yes Xus.
