HNUB TIM 19 LUB 11 HLIS; HNUB PEB LUB LIS PIAM 33 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 19: 1-10)
Kwv tij Hmoob, thaum peb hnov lub Moo Zoo ntu hais txog Ntxas Kais mas peb xav li cas? Ua cas Ntxas Kais thiaj tau txais kev cawm?
Ntawv Moo Zoo piav tias Ntxas Kais yog ib tug nom sau se nplua nuj nyob hauv lub tsheej Yes Lis Kos, tsoom pej xeem tsis nyiam nws. Thaum Ntxas Kais hnov tias Huab Tais Yes Xus tab tom hla lub tseej yuav mus rau Yes Lus Xas Les, nws xav pom Huab Tais Yes Xus mas nws thiaj nrog tsoom sid mus tos Huab Tais Yes Xus kev, tab sis vim nws qig taub ntsia tsis pom, nws thiaj nce mus nyob saum tsob txiv cev.
Kwv tij Hmoob, ib tug neeg muaj hwj chim ua nom mas puas phim nws yuav nce mus nyob saum tej ntoo xws li ib tug me nyuam yau tsis paub txaj muag?
Ntshai ceeb laj nrhiav tau ib tug nom ua zoo li Ntxas Kais!
Ntxais Kais ntshaw pom Huab Tais Yes Xus dhau, mas nws thiaj tsis quav ntsej tias tsam tas tsoom sid yuav luag yuav hais lus xyav nws.
Thaum Huab Tais Yes Xus pom Ntxas Kais ua zoo li ntawd, mas Huab Tais Yes Xus luag ntxhi rau Ntxas Kais, tsis hais lus tsis zoo mloog los lus phem dab tsi. Huab Tais Yes Xus tsuas hais tias “Ntxas Kais, koj nqes los sai, vim hnub no kuv yuav tsum mus hauv koj tsev.”
Kwv tij Hmoob sawv daws, Huab Tais Yes Xus cov lus no ua rau Ntxas Kais xav tsis thoob, tsoom pej xeem los lawv puav leej xwv tsis txog li thiab.
“Ua cas Tswv Ntuj tus neeg thiaj xav chaws los hauv tus neeg txhaum ib zeej tsoom tsis hwm xws li kuv!” Nyaj Ntxas Kais yuav xav li no.
Huab Tais Yes Xus lo lus tias “Kuv yuav tsum mus hauv koj tsev”, lo lus no muaj hwj chim ua tau kom Ntxas Kais hloov siab tshiab. Ntxas Kais hais tias “Huab Tais, kuv yuav muab kuv tej cuab tam ib nrab pub rau cov pluag. Kuv yuav muab 4 npaug rauj rau tus kuv tau dag noj lawv lub cuab tam, tau nyiag lawv tug los ua kuv tug.”
Kwv tij Hmoob sawv daws, Ntxas Kais ua ib tug piv txwv zoo tshaj rau peb sawv daws yoog.
Peb hnov Tswv Ntuj Lo Lus nrov tuaj txog peb siab, peb cia Tswv Ntuj Lo Lus los ntxuav peb siab, ces peb tu siab rau peb cov txhaum, peb tau ua tsis zoo rau leej twg, ua tsis ncaj rau leej twg, mas peb thov txim ntawm nws, peb pauj rov rau nws. Peb ua li no mas peb thiaj hloov siab tshiab tau.
Yog peb lub ncauj hais tias ‘Kuv tu siab”, tab sis peb tsis ua pauj rov rau tus neeg peb ua tsis ncaj rau nws, mas puas yuav hais tau tias peb hloov siab tshiab!
Kwv tij Hmoob sawv daws, zes lub caij Tos Huab Tais lawm, peb yuav tau rov tu peb lub siab ntsws kom huv tiag tiag. Peb muab ua tib zoo xav saib, peb tau ua tsis ncaj rau leej twg, peb tau txeeb leej twg li cuab tam los ua peb tug, peb tseem tsis tau pauj yam twg rau tus peb tau mus txais, peb tseem tsis tau thov txim ntawm leej twg. Peb muab sau tawm los, ces lub caij no, peb ua xws li Ntxas Kais; pauj rov rau lawv kom tas. Peb thiaj tsim nyog txais Huab Tais Yes Xus los nyob hauv peb, vim tias hnub no Huab Tais Yes Xus twb xub hais rau peb ua ntej lawm tias “Lub caij Huab Tais Yug Los, mas kuv yuav tuaj so hauv koj tsev.” Nyob zoo sawv daws.
