Zaj nyeem hnub tim 18 lub 2 hlis 2026
Hnub Plaub Txais Tshauv
Cov lus nyob hauv Mas Tais Ntawv Moo Zoo (MT 6:1-6, 16-18)
Kwv tij sawv daws, hnub no yog hnub Plaub Txais Tshauv, txhais tias peb rov qab los txog rau lub caij Plaub Caug ib zaug ntxiv, uas yog lub caij tseem ceeb thiab muaj nuj nqis nyob rau hauv ib lub xyoo, yog lub caij hauv kev cawm neeg. Txhua hnub peb siv peb lub sij hawm rau kev khwv noj khwv haus, kev noj zoo hnav zoo, kev tu yus lub cev ntaj ntsug, tiam sis, peb muaj lub sij hawm me me xwb, uas yuav los tu peb tu ntsuj plig kom ntshiab huv thiab zoo nkauj zoo nraug nyob rau ntawm Tswv Ntuj xub ntiag.
Nyob rau hauv phau ntawv Xas Muas tsab ntawv ib zaj 16 : 7 hais tias : “Koj txhob saib nws tus yam ntxwv sab nraud. Huab Tais nws ntsuas tas txhia yam, nws tsis ntsuas zoo li neeg. Neeg saib tus yam ntxwv sab nraud, hos Huab Tais saib hauv lub siab lub nplawv.”
Nyob rau hauv lub caij Plaub Caug no thov caw peb tsoom ntseeg sawv daws, siv ib lub sij hawm nyob rau hauv txhua txhia hnub, kom tau koom ua ib ke nrog Huab Tais Yes Xus nyob rau hauv kev teev Ntuj kev ua Missa, kev nyeem ntawv Moo Zoo, kev zov lub Cim Yug, los yog kev tsim koob tsim hmoov, los kev ua tej yam zoo los cav txog Tswv Ntuj lub Koob Meej.
Thov Huab Tais Tswv Ntuj foom koob hmoov pub rau ib tsoom kwv tij hmoob sawv daws uas kub siab coj cov kab ke nyob rau hauv lub caij plaub caug no kom zoo. Kom xwv npaj siab tos txais Huab Tais Yes Xus kev sawv rov los thiab muaj lub hwj chim ci ntsa nyob rau lub caij Hla uas tuaj yuav txog no. peb yuav muaj kev zoo siab hom khaj koom nrog Huab Tais. Tus uas tau npaj siab, nws yuav tau txais Huab Tais txoj koob hmoov zoo, nws yuav muaj kev kaj siab lug nyob rau lub caij no.
