HNUB TIM 18 LUB 11 HLIS; HNUB CEV LEEJ NTSHIAB POB ZEB THIAB LEEJ NTSHIAB PAJ LUG LUB TUAM TSEV RAU TSWV NTUJ
COV LUS NYOB HAUV MAS TAIS NTAWV MOO ZOO (MT 14: 22-33)
Cov kwv tij Hmoob, hnub no yog hnub cev Leej Ntshiab Pob Zeb thiab Leej Ntshiab Paj Lug lub Tuam Tsev rau Tswv Ntuj. Lub Tuam Tsev no txhim tsa nyob saum thaj chaw uas yog Leej Ntshiab Pob Zeb thiab Leej Ntshiab Paj Lug lub ntxa. Kev ua hmoov hauv hnub no thiaj yog kom peb nco txog 2 tug hauv paus xa lus tseem ceeb tshaj plaws hauv lub Koom Txoos. Leej Ntshiab Pob Zeb piv xam li yog tus ncej kev ntseeg, Leej Ntshiab Paj Lug piv li yog tus ncej tshaj lub Moo Zoo.
Leej Ntshiab Pob Zeb thiab Leej Ntshiab Paj Lug lub Tuam Tsev no yog Koom Txoos lub hauv paus thiab yog qhov chaw rau ib zeej tsoom tuaj txais Ntuj lub txiaj ntsim.
Tus vaj Koos Taas Tis Nus txhim Leej Ntshiab Pob Zeb lub Tuam Tsev Teev Ntuj raws li nws niam txoj kev npau suav hauv xyoo 326. Yuav tos txog 23 xyoos mas thiaj txhim tiav.
Nyob hauv tiam 16 lawv tau muab lub Tuam Tsev rhuav thiab txhim dua ib lub tshiab. Xyoo 1626 lub 11 hlis hnub tim 18 mas Vaj Qhia Aws Npas 8 thiaj ua kab ke cev Leej Ntshiab Pob Zeb lub Tuam Tsev no rau Tswv Ntuj.
Hos Leej Ntshiab Paj Lug lub Tuam Tsev mas pib txhim nyob hauv xyoo 324.
Kwv tij, lub Moo Zoo hnub no, lub Koom Txoos xaiv cov lus piav txog thaum cov thwj tim pom Huab Tais Yes Xus mus ko taw saum dej ntuj mas lawv xav tias yog poj ntxoog ces lawv ntshai. Pob Zeb thov tsum dej ntuj mus nrhiav Huab Tais Yes Xus, thaum nws pom nthwv cua ua rau nws ntshai ces nws pib tog mas Huab Tais Yes Xus thiaj cev tes npo Pob Zeb.
Nyob hauv zaj no mas Huab Tais Yes Xus hais rau Pob Zeb tias tos Pob Zeb tog vim nws ua xyem xyav, nws lub siab ntseeg tsawg dhau.
Huab Tais Yes Xus cov lus no kuj yog ntuas peb sawv daws kom txhob ua xyem xyav txog peb txoj kev ntseeg, mas peb thiaj yuav tsis tog rau hauv qhov tuag, peb thiaj yuav hla dhau tej xwv txheej tuaj nphav peb.
