ZAJ NYEEM HNUB TIM 18 LUB 10 HLI 2024
HNUB UA HMOOV LEEJ NTSHIAB LUS KAS
COV LUS NYOB HAUV LUS KAS NTAWV MOO ZOO (LK 10: 1-9)
Cov kwv tij Hmoob, hnub no lub Koom Txoos ua hmoov Leej Ntshiab Lus Kas tus sau Ntawv Moo Zoo. Lus Kas yog neeg Hes Las yug nyob hauv lub nroog As Nthias Kias, nws txoj hauj lwm yog kws kho mob. Thaum tus Hauv Paus Xa Lus Paj Lug tuaj tshaj lub Moo Zoo txog As Nthias Kias, mas Lus Kas tau hloov siab tshiab los ntseeg txog Yes Xus, ces Lus Kas thiaj ua Paj Lug tus kwv luag mus tshaj lub Moo Zoo.
Lus Kas paub tias nws tsuas yog tus kwv luag xwb, nws tsis yog ib tug yuav sawv los tuav txoj hauj lwm tshaj lub Moo Zoo xws li Paj Lug los Pob Zeb, los xws li lwm tus Hauv Paus Xa Lus, qhov nws ua tau mas yog sau tej xwm nws tau pom tau ntsib tseg cia rau cov neeg tiam tom qab tau paub txog cov Hauv Paus Xa Lus cov hauj lwm, thiab yam nws yuav pab tshaj lub Moo Zoo, mas yog khaws cov xwm hais txog Huab Tais Yes Xus lub neej tseg cia ua lus Hes Las rau cov Hes Las tau paub txog lub Moo Zoo.
Kwv tij, peb sawv daws, tsis hais peb ua txoj hauj lwm dab tsi, los peb puav leej muaj feem pab cov Leej Choj tshaj lub Moo Zoo xws li Leej Ntshiab Lus Kas tau, vim tias txij hnub peb tig los yuav lub siab tshiab ntseeg txog Huab Tais Yes Xus lawd, mas peb sawv daws yeej tau txais txoj kab xwm tshaj lub Moo Zoo, tsuas yog nyias tshaj raws li nyias rab peev xwm thiab nyias kev txawj, tsuav yog kom peb ncaj ncees rau lub Moo Zoo, rau Tswv Ntuj Lo Lus nyob hauv Huab Tais Yes Xus.
Lub Moo Zoo hnub no Huab Tais Yes Xus ntuas peb kom thov Huab Tais Tswv Ntuj xaiv ib pab hauv peb los mus ua Huab Tais Tswv Ntuj cov tub zog.
Kwv tij, zim txwv no mas lub Moo Zoo twb ri mus thoob lub qab ntuj lawm, yog lub zim txwv cov qoob zoo sau lawm; yam li yog lub caij nplej siav daj qab hnab cuag cas lawm. Tab sis cov tub sau qoob; yam li cov Leej Choj los cov tub ntxhais tshaj Ntuj Lus mas tseem muaj tsis txaus, ces muaj ntau txhiab tus neeg ntseeg tau hnov lub Moo Zoo tab sis tseem tsis to taub lub Moo Zoo, ces lawv tseem ua lub neej xws li qhov qub, tsis muaj tus mus pab lawv kom hloov siab tshiab. Yog li mas peb sawv daws yuav tau rau siab ntso thov Huab Tais Tswv Ntuj tuaj tshoj peb tsoom neeg hauv lub Koom Txoos kom tawm mus pab lawv cov no, mus ua tub zog sau Huab Tais Tswv Ntuj cov qoob tsam lig dhau rau lawv, ces yuav zoo li cov nplej siav siav nkig nkig lov duav tas.
