ZAJ NYEEM HNUB TIM 17 LUB 6 HLI 2024
HNUB OB LUB LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 5: 38-42)
Kwv tij Hmoob sawv daws, lub Moo Zoo hnub no yog cov lus Huab Tais Yes Xus tshaj txog txoj cai tshiab rau cov thwj tim mloog. Huab Tais Yes Xus tsis yog tuaj rhuav Mais Xes txoj cai, tab sis Huab Tais Yes Xus tuaj qhia kom thoob, tuaj qhia kom ntxaws ntxaws, kom sawv daws tsom txog lub ntsiab hauv txoj cai.
Nyob ntiaj teb no peb pom neeg tsim tau txoj cai los kav neeg, los tswj neeg kom ua tau ib tug neeg tsim txiaj, kom neeg muaj tsim sib luag, kom ib tug txhob hla ib tug cai, kom ntiaj teb neeg nyob hauv txoj kev ncaj. Neeg tsim tej cai ntawd los mas yeej zoo rau neeg kawg, tab sis vim neeg tsim raws li neeg lub tswv yim, neeg tsa txoj cai raws li neeg xav. Tab sis Huab Tais Yes Xus txoj cai tsis zoo li ntawd, Huab Tais Yes Xus txoj cai yog tuaj ntawm Tswv Ntuj tuaj, yog tsa raws li Tswv Ntuj lub siab nyiam.
Peb hnov tej lus hais tias luag ua txhaum rau koj, mas luag yuav tsum raug ib lub txim hnyav los sib raws li yam luag ua txhaum rau koj. Peb hnov hais tias yog ib tug neeg nyiag lwm tus lub cuab tam mus, mas nws yuav pauj rov rau. Ua li no thiaj yog ua qhov ncaj.
Tab sis ntawm Tswv Ntuj tsis yog li ntawd. Luag ua phem rau koj, mas koj txhob ua pauj rau luag. Qhov no yog Tswv Ntuj qhov ncaj. Hnub no, peb thiaj hnov Huab Tais Yes Xus cov lus hais tias “Leej twg ib ncuav pias rau koj sab plhu xis, koj tig sab plhu laug rau nws thiab. Leej twg xav ua plaub rau koj kom tau koj lub tsho, mas koj muab koj lub tsho tshaj sab ntxiv rau nws thiab. Leej twg thov koj xa nws mus ib ncuas kev, koj nrog nws mu sob ncuas. Leej twg thov koj, mas koj pub rau nws. Leej twg xav txais nyiaj ntawm koj, mas koj txhob tig nraub qaum rau nws.”
Kwv tij Hmoob, Tswv Ntuj hlub ntiaj teb neeg ib yam, tsis hais tus zoo los tus phem. Tswv Ntuj tu siab thaum pom peb sib ntxub, Tswv Ntuj los kua muag thaum peb tsis sib hlub. Peb hais tias peb nyiam Tswv Ntuj, mas peb yuav ua raws li Tswv Ntuj qhov ncaj; nrog Tswv Ntuj tsim kev haum xeeb.
