ZAJ NYEEM HNUB TIM 16 LUB 7 HLI 2024
HNUB NIAM MAB LIAB YEES TAWM SAUM ROOB KAS MES
COV LUS NYOB HAUV MAS TAIS NTAWV MOO ZOO (MT 11: 20-24)
Kwv tij Hmoob sawv daws, peb hais tias Huab Tais Yes Xus yog tus siab zoo, hlub thiab khuv leej neeg. Tab sis lub Moo Zoo hnub no, peb hnov Huab Tais Yes Xus hais ib co lus tsawm; yog lo lus tias “Koj txoj hmoov phem!”
Dab tsi ua rau Huab Tais Yes Xus hais lo lus tsawm no?
Lub Moo Zoo hais tias Huab Tais Yes Xus tsawm lub nroog Kos Las Ntxhis, Npes Xais Das, thiab Kas Fas Naus. Huab Tais Yes Xus tsawm 3 lub nroog no vim yog thaj tsam Huab Tais Yes Xus nyob thiab ua hwj huam yees ntxwv ntau dua cov. Cov neeg nyob hauv cov nroog no pom Huab Tais Yes Xus ua hwj huam, lawv cav txog Huab Tais Yes Xus lub moo tab sis lawv tsis ntseeg tias Huab Tais Yes Xus yog Leej Pleev, lawv tsis hloov siab.
Kwv tij Hmoob, Huab Tais Yes Xus yog Tswv Ntuj, nws lo lus tsawm muaj zog tiag. Niaj hnub no, nyob hauv His Xas Lais teb thiaj tsis muaj 3 lub nroog no lawm, lwm lub nroog mas tseem nyob txom tav no.
Huab Tais Yes Xus lub Moo Zoo hnub no zoo qhia dab tsi rau peb?
Lub Moo Zoo qhia peb tias Huab Tais Yes Xus hais dab tsi mas yeej yuav muaj tuaj zoo li ntawd tiag. Huab Tais Yes Xus hais tias 3 lub nroog tau pom cov hwj huam tab sis lawv tsis ntseeg mas lawv txoj hmoov phem. Yog li tus twg tau pom Huab Tais Yes Xus cov hwj huam, tau hnov Huab Tais Yes Xus cov lus, nws tsis ntseeg mas txog hnub txiav txim nws kuj yuav tau txoj hmoov phem xws li Huab Tais Yes Xus tau hais tseg thiab.
Peb txhob xav tias niaj hnub no Huab Tais Yes Xus tsis ua hwj huam rau peb pom lawm. Txhob xav li ntawd!
Yam peb yuav xav, mas yog txhua hnub peb yuav tso lub qub siab pov tseg, tig los yuav lub siab tshiab, kho peb lub neej kom taug tau Tswv Ntuj txoj kev ntshiab. Peb ua ib nrab, cev ib nrab rau Huab Tais Yes Xus ua tus pab. Peb yuav thov Huab Tais Tswv Ntuj xa Leej Ntuj Plig tuaj pab peb kom txawj hloov siab tshiab, txhob ua tus neeg xwb qwb txhav xws li cov nroog peb tau hnov hauv hnub no.
