ZAJ NYEEM HNUB TIM 15 LUB 10 HLI 2025
HNUB NCO TXOG LEEJ NTSHIAB TES LES XAS AS VIS LAS
COV LUS NYOB HAUV LUS KAS NTAWV MOO ZOO (LK 11: 42-46)
Kwv tij sawv daws, Huab Tais Yes Xus nyiam thiab hlub neeg sawv daws. Tas nrho cov uas yeej coj ncaj coj zoo lawm thiab cov uas tseem coj zoo tsis tau txaus, thov kom peb muaj lub siab tiag, txawm peb yuav yuam kev, peb lees peb qhov txhaum thiab peb xav tig los ua zoo, ces Huab Tais zoo siab yuav zam rau peb, vim Huab Tais khuv leej peb, nws xav pab peb, kom peb tig rov los ua ib tug neeg ncaj neeg zoo. Tiam sis, yog tus ua yuam kev lawm, nws tsis kam hloov siab, nws tsis lees nws lub txim txhaum, nws tseem hais lus ntxeev mus ntxeev los dag luag tej, tus neeg zoo li no, Huab Tais yuav pab tsis tau nws. Vim nws tsis kam hloov nws lub siab, nws tsis kam tig los ua qhov yog. Zoo li no leej twg thiaj yuav pab tau nws, yam li cov Fas Lis Xais, uas nws khwv tswv yim los ua tej yam kom luag qhuas nws, nws tsuas zoo sab nraud xwb, tus tsis paub mas luag pom luag hais tias, nws yog ib tug neeg coj zoo thiab nyiam Ntuj tiag, tiam sis, qhov tseeb, nws lub siab nkhaus, nws coj tsis ncaj, nws tsuas lam ua zoo rau luag tej qhuas xwb, vim li ntawd Huab Tais Yes Xus thiaj hais ib co lus twm lawv, Huab Tais muab cov Fas Lis Xais coj tsis ncaj ntawd piv zoo li ib lub ntxa lwj, uas sab nraud mas luag saib zoo nkauj kawg, tiam sis, sab hauv mas lwj dhi xwb.
Kwv tij phooj ywg sawv daws, peb yuav tsum xyaum coj ncaj coj zoo tiag, peb yuav xyaum ua qhov yog, thaum peb paub tias peb yuam kev lawm, mas peb kav tsij tig los ua qhov zoo qhov yog sai sai, mas Huab Tais yuav khuv leej peb, nws yuav pab peb kom peb nrhiav tau txoj kev zoo taug.
Nyob zoo sawv daws.
