ZAJ NYEEM HNUB TIM 14 LUB 3 HLIS 2025
HNUB RAU, LIS PIAM 1 CAIJ PLAUB CAUG
(EXK 18:21-28; MT 5:20-26)
Kwv tij Hmoob, nyob hauv caij Plaub Caug mas lub Koom Txoos txhib peb sawv daws kom ua cov hauj lwm them txim. Kev them txim no piv tau rau daim iav tsom peb lub neej tias puas yog ib tug neeg nyiam ua ywj peb siab, nyiam nrhiav qhov zoo rau peb tseg qhov phem rau luag tej, nyiam yus tus kheej tsis nco hlub luag lwm tus. Thaum peb them txim peb rov nco txog peb kev txhaum qhov yuam kev, ces peb tu siab rau peb cov txhaum, peb thov Tswv Ntuj zam rau peb. Tus Yaj Saub Es Xes Kias hais tias “Huab Tais Tswv Ntuj hais li no; tus muaj ib lub siab phem yog nws tseg tsis ua txhaum, nws coj cov lus qhia thiab nws ua raws nraim txoj kev ncaj kev ncees mas nws yuav muaj txoj sia. Kuv yuav tsis nco txog nws cov txhaum. Tus neeg siab phem nws tso nws txoj kev phem pov tseg, nws los ua qhov ncaj qhov tsim nyog ua, nws txoj sia yuav nyob. Nws pom dheev nws cov txhaum thiab nws tso nws txoj kev phem pov tseg, mas nws yuav tsis tuag” (EXK 18: 21, 27-28).
Yog vim li ntawd, hnub no Huab Tais Yes Xus thiaj ntuas peb cov mloog nws lus tias “Nej tsum ua siab ncaj dua cov Kws Ntawv Ntshiab thiab cov Fas Lis Xais, mas nej thiaj mus tau hauv Tswv Ntuj lub Ceeb Tsheej. Cov Kws Ntawv Ntshiab thiab cov Fas Lis Xais lawv paub qhov ncaj thiab txoj cai tab sis lawv tsis ua raws, lawv tseem muab kev ncaj thiab txoj cai los yuam rau tsoom sid. Nej tsum ua neeg siab zoo siab mos, tsis txhob chim txhob npau taws txhob cem luag tej, mas nej thiaj tsis poob hauv dab phem cov hluav taws. Nej nrog nej cov kwv tij sib haum xeeb, sib nyiam sib hlub, mas Tswv Ntuj thiaj mloog nej.”
Kwv tij, ua cov hauj lwm them txim tsis yog kom tau lus qhuas los tau ntsej muag, ua cov hauj lwm them txim tsis yog ua vim lub Koom Txoos hais kom ua, ua cov hauj lwm them txim tsis yog ua kom tag cai. Tab sis ua cov hauj lwm them txim kom tau ntxuav yus lub siab phem kom huv tuaj, ua cov hauj lwm them txim kom yus muaj lub siab nyiam hlub thiab pab lwm tus, ua cov hauj lwm them txim kom yus swm rau kev ua zoo ua ncaj rau sawv daws.
