ZAJ NYEEM HNUB TIM 12 LUB 8 HLI 2024
HNUB NCO TXOG LEEJ NTSHIAB ZAS DAWS TSHAS TAS
COV LUS NYOB HAUV MAS TAIS NTAWV MOO ZOO (MT 17: 22-27)
Kwv tij Hmoob sawv daws, hnub no peb hnov tus sau se rau lub Tuam Tsev Teev Ntuj nug Pob Zeb tias “Nej tus Xib Hwb puas them se pab lub Tuam Tsev Teev Ntuj?”
Tos tus sau se tuaj nug li no, vim tias muaj ib txhia Xib Hwb qhia Mais Xes txoj cai tsis kam them se rau lub Tuam Tsev Teev Ntuj; lawv cav tias lawv yog tsoom pej xeem tus Xib Hwb lawm, lawv leg Tswv Ntuj txoj hauj lwm mas lawv tsis yuav them se. Lawv yog cov neeg zoo sab nraud raws li Huab Tais Yes Xus nyiam hais txog lawv.
Cov Xib Hwb Fas Lis Xais ntawd qhia tsoom pej xeem kom them se ib feem kaum tab sis lawv tsis them. Lawv ua puas ncaj, lawv puas ua raws li lawv cov lus?
Hnub no, tej zaus tus sau se yuav xav tias Huab Tais Yes Xus yuav ntxab ntxawm ua li lawd. Tab sis Pob Zeb teb rau nws tias ib txwm mas Huab Tais Yes Xus yeej them se xws li tsoom pej xeem. Huab Tais Yes Xus ua ncaj tiag.
Kwv tij Hmoob, muab piv rau peb lub neej niaj hnub nyem no, mas peb yuav pom tseeb, vim peb sawv daws yuav raug them se rau tseem hwv ntau los tsawg raws li cov nyiaj peb nrhiav tau, thiab raws li lub teb chaws txiav. Tab sis yog nyob nyob muaj ib tug tseem hwv tsa ib txog cai tshiab hais tias cov tseem hwv yuav tsis them se vim lawv ua hauj lwm rau lub teb chaws, nej xav tias qhov ntawd puas yuav ncaj?
Li no, hnub no Huab Tais Yes Xus thiaj hais rau Pob Zeb tias “Wb yuav tsis txhob ua kom luag to taub yuam kev. Koj mus muab lub txiaj nyiam ntawm tus ntses koj nuv tau los them se rau wb.”
Lub Moo Zoo hnub no zoo qhia peb tias tab txawm peb yuav tuav ib txog hauj lwm ua rau lub Koom Txoos, los yog tshaj Ntuj Lus, los coj ib txog hauj lwm loj dua lwm tus; peb tsis txhob muab qhov ntawd los ua chaw xyeej kom peb muaj cai loj dua lawv. Peb yuav ua tus loj sib txig li sawv daws.
Tshwj xeeb mas yog thaum peb mus teev Ntuj, peb txhob xav tias ‘Ab! Hnub no kuv twb ua ib tug tub coj nkauj lawm’, ‘Ab! Hnub no kuv twb nqa ib cov txiv xyoob txiv ntoo tuaj txi Ntuj lawm’; ‘kuv tsis yuav qee nyiaj pub rau lub tsev teev Ntuj.’
Peb txhob ua li ntawd, nyob zoo sawv daws.
