ZAJ NYEEM HNUB TIM 12 LUB 6 HLI 2024
HNUB PLAUB LUB LIS PIAM 10 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 5: 17-19)
Kwv tij Hmoob sawv daws, Mais Xes txoj cai yog qhia rau cov His Xas Lais tias lawv yuav ua lub neej zoo li cas thiaj xis Tswv Ntuj siab. Mais Xes txoj cai yog cov txwm ntawv tsis muaj sia, mas cov kws ntawv thiaj nthuav lub ntsiab raws li lawv lub tswv yim, lawv tsis nco pom tias qhov tseeb Tswv Ntuj kom lawv coj txoj cai mas yog Tswv Ntuj xav kom lawv ua xis Tswv Ntuj lub siab nyiam, tsis yog ua raws li lawv lub siab nyiam. Huab Tais Yes Xus thiaj hais tias nws tsis los rhuav txoj cai, tab sis Huab Tais Yes Xus los qhia txoj cai kom thoob. Huab Tais Yes Xus tsis yog los muab qhov ncauj qhia xwb, tab sis Huab Tais Yes Xus muab tas nws txoj sia los ua piv txwv rau lawv pom tias tus neeg ua raws txoj cai lub ntsiab yog zoo li cas. Txoj cai lub ntsiab yog nyiam Tswv Ntuj thiab hlub tib neeg, tsis yog txoj cai sau li cas ces cia li ua raws li ntawd.
Kwv tij Hmoob sawv daws, nyob hauv peb lub neej mas peb pom tias muaj ntau txoj cai; xws li tseem hwv tej cai lij choj tswj teb chaws, zej zos txoj cai sawv daws yuav tau ua raws nyob hauv ib lub zos twg, txoj cai thaum ib tug neeg tsav tsheb tawm mus tom tej tog kev. Tas cov txoj cai ntawd lub ntsiab puav leej yog vim neeg lub siab hlub neeg, mas neeg thiaj tsa kom muaj tuaj. Tab sis ntaus zaus peb tsis xav txog ces thaum muaj tej tus hla txoj cai los muaj plaub muaj ntug, sawv daws pheej yuav txiav mus raws li cov txwm ntawv sau nyob hauv xwb. Peb ua zoo li peb yog ib yam twj neeg tsim los, zoo li peb yog lub hlwb hlau luag nias kom ua li cas ces cia ua li ntawd, tsis muab peb lub siab los ntsuas los xav txog.
Kwv tij Hmoob sawv daws, peb ua neej nyob mas yeej muaj ntau txoj cai li hais tiag, tab sis thaum peb yuav txiav txim rau ib tug neeg tau hla txoj cai, mas xav kom peb muab lub siab nyiam luag tej coj los ua qhov chaw xav; txhob maj txiav rau lwm tus.
