ZAJ NYEEM HNUB TIM 10 LUB 6 HLI 2024
HNUB OB LUB LIS PIAM 10 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 5: 1-12)
Kwv tij Hmoob sawv daws, hnub no Huab Tais Yes Xus qhia peb tias peb yuav ua lub neej zoo li cas thiaj tau txoj hmoov zoo. Huab Tais Yes Xus qhia tias yog koj xav tau txoj hmoov zoo, koj yuav tau koom ua ib tug nrog cov neeg pluag, cov neeg quaj ntsuag, cov nqhis txoj kev ncaj. Peb yuav koom ua ib tug nrog lawv tau li cas, kawg yuav tau yuav lub siab zoo, lub siab muag siab mos, lub siab huv, thiab tsim kev thaj yeeb. Peb yuav xub ua tej ntawd nyob hauv peb lub cuab ua ntej, ces mam tseb mus rau ib puag ncig.
Cov kwv tij, ntau zaus peb ua neeg siab zoo, siab muag, siab huv thiab tsim kev thaj yeeb; tab sis peb raug thuam raug lwm tus saib tsis taus, los yog raug hiam kuj muaj. Li ntawd, peb kuj yuav tsum muaj lub siab ntseeg ruaj kho thiab muaj cuab kav mas peb thiaj yuav hla dhau.
Tshuav ib yam, yog qhov tias peb yuav ruaj siab rau Huab Tais Yes Xus cov lus tias Huab Tais Yes Xus yuav muab txoj sia nyob mus li rau peb.
