ZAJ NYEEM HNUB TIM 2 LUB 7 HLI 2025
HNUB PLAUB, LIS PIAM 13 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 8: 28-34)
Kwv tij Hmoob, lub teb chaws Nkas Das Las yog nyob ntawm lub pas dej Nkas Lis Lais sab tim ub, uas yog nyob rau sab hnub tuaj. Nkas Das Las nyob hauv lub xeev Des Kas Pos Lis, hos cov nroog thiab cov zos Huab Tais Yes Xus nyob ntau thiab ua hwj huam yees ntxwv tau, mas nyob rau lub xeev Nkas Lis Lais uas yog nyob ntawm lub pas dej Nkas Lis Lais sab hnub poob.
Cov Yus Das thiab cov neeg txheeb cov Yus Das mas lawv saib npua yog ib yam tsiaj tsis huv, yog ib yam tsiaj muaj dab nrog, ces lawv tsis yug thiab tsis noj npua. Tab sis cov neeg hauv lub teb chaws Nkas Das Las tsis yog haiv neeg Yus Das, mas lawv thiaj yug npua tej npoj coob coob cia tau ua txhiam xws noj haus thiab txi lawv cov dab. Thaum Huab Tais Yes Xus thiab cov thwj tim caij nkoj hla lub pas dej Nkas Lis Lais tuaj txog, mas muaj 2 tus neeg raug dab tawm tuaj ntsib Huab Tais Yes Xus, ces Huab Tais Yes Xus txawm ntiab cov dab ntawd mus nyob hauv pab npua, ces pab npua dhia tsag poob hauv dej tuag tas. Cov neeg Nkas Das Las pom li ntawd, mas lawv khuv xim lawv cov npua, ces lawv thiaj thov kom Huab Tais Yes Xus thiab cov thwj tim tawm hauv lub teb chaws Nkas Das Las mus.
Kwv tij Hmoob, peb yuav pom tias cov neeg nyob thaj tsam Nkas Das Las no, mas lawv pom Huab Tais Yes Xus ua hwj huam cawm tau lawv 2 tug neeg raug dab tiag, tab sis lawv lub siab ntshaw lawv cov npua uas yog lawv lub cuab tam dua lawv ob tug neeg rov tsheej neeg, ces lawv thiaj tsis kam txais Huab Tais Yes Xus los nyob hauv lawv lub zos. Lawv saib cov npua tseem ceeb dua txoj kev hlub neeg. Lawv saib lub cuab tam nyob ntiaj teb no muaj nqes dua lub cuab tam Huab Tais Yes Xus coj tuaj. Lawv tsis xav paub Huab Tais Yes Xus.
Muab piv rau peb, mas tej zaum muaj tej tus twb tau kev pab tau kev cawm ntawm Tswv Ntuj tsis kav nws tsis kam ntseeg; muaj tej tus twb pom Tswv Ntuj kiag ntawm nws ob lub qhov muag, tsis kav nws kuj tsis kam ntseeg, vim tias yam Tswv Ntuj ua rau nws pom thiab yam nws lub siab xav tau, mas tsis mus zoo xws tib yam. Muaj ib txhia nws ntseeg tab sis nws tsis kam txais Tswv Ntuj los nyob hauv nws, los kuj muaj.
Li ntawd mas kwv tij Hmoob, peb txhob ua xws li cov neeg hauv Nkas Das Las. Peb txhob ntiab Huab Tais Yes Xus tawm hauv peb lub neej mus. Peb txhob tos kom Huab Tais Yes Xus ua qhov haum peb siab tso, peb mam kam txais Huab Tais Yes Xus los nyob hauv peb.
Kwv tij, yog tias peb tsis saib neeg lub tsim, peb tsis paub hwm neeg, peb tsis muab txoj kev sib nyiam sib hlub sab ua qhov loj, mas peb kawg zoo li cov neeg nyob Nkas Das Las.
