ZAJ NYEEM HNUB TIM 1 LUB 10 HLI 2024
HNUB NCO TXOG LEEJ NTSHIAB TES LES XAS LIS XYAWS
COV LUS NYOB HAUV MAS TAIS NTAWV MOO ZOO (MT 18: 1-5)
Kwv tij Hmoob, hnub no lub Koom Txoos nco txog Leej Ntshiab Tes Les Xas nyob Lis Xyaws los yog Tes Les Xas nyiam me nyuam Yes Xus. lub Moo Zoo hnub no mas lub Koom Txoos thiaj xaiv zaj nyeem hauv Mas Tais Ntawv Moo Zoo, zaj Huab Tais Yes Xus qhia kom peb hloov los ua xws li cov me nyuam; yog ua tus neeg me tsis muab hlob thiab hnav lub siab dawb coj lub tswv yim huv. Huab Tais Yes Xus hais tias “Yog nej tsis hloov rov los ua xws li ib co me nyuam, mas nej yuav mus tsis tau hauv Ntuj lub Ceeb Tsheej.”
Leej Ntshiab Tes Les Xas nyob Lis Xyaws yog ib tug piv txwv qhia peb txog tus neeg hloov ua xws li cov me nyuam.
Thaum Leej Ntshiab Tes Les Xas tseem yau mas nws yeej muaj ib lub tswv yim xav ntsoov txog kev nyiam Tswv Ntuj thiab hlub lwm tus. Thaum Leej Ntshiab Tes Les Xas muaj 14 xyoos, nws hnov tias muaj ib tug neeg siab phem tua neeg mas nws yaum nws tus viv ncaus nrog nws thov Ntuj rau tus neeg siab phem ntawd, kom Tswv Ntuj hloov tau tus neeg siab phem lub siab kom txawj tu siab rau nws qhov txhaum. Thaum Leej Ntshiab Tes Les Xas muaj 15 xyoos, nws xav qee nws lub neej los ua cov hauj lwm thov Ntuj pab cov ntsuj plig muaj txhaum mas nws thov Vaj Qhia pom zoo cia nws cog lus ua ib tug Leej Phauj kom tau pab cov ntsuj plig hauv teb chaws them txim. Thaum lub caij Leej Ntshiab Tes Les Xas cog lus ua Leej Phauj lawd, nws ua cov Phauj sawv daws tus ntxhais txib.
Leej Ntshiab Tes Les Xas coj nws lub siab pluag kev nyiam Tswv Ntuj thiab hlub tib neeg, mas nws thiaj muaj ib lub siab nqhis Tswv Ntuj txoj kev nyiam, nws thiaj nrhiav kev nyiam Tswv Ntuj thiab ua hauj lwm hlub sawv daws mus txog lub zim txwv nws txoj sia tu. Ua ntej yuav tuag, Leej Ntshiab Tes Les Xas tseem hais lo lus no tias “Huab Tais Tswv Ntuj, kuv nyiam koj tas siab tas ntsws.” Nws kuj hais tias “Txawm kuv tuag lawm los kuv tseem yuav tseb nplai paj ntshua nplaim puag saum ntuj los rau nej sawv daws.”
Kwv tij Hmoob, Leej Ntshiab Tes Les Xas yog tus neeg me xws li cov me nyuam yaus Huab Tais Yes Xus hais nyob hauv hnub no tiag. Tsis yog cov me nyuam yaus yuav ywj nws siab, tsis yog cov me nyuam yaus taij niam taij txiv kom ua raws li nws ntshaw. Tab sis yog cov me nyuam yaus yeem ua raws niam txiv siab, yog cov me nyuam yaus nyiam niam nyiam txiv, yog cov me nyuam yaus txawj hlub luag tej, yog cov me nyuam yaus muaj ib siab dawb lub tswv yim huv.
Peb yuav yoog raws Leej Ntshiab Tes Les Xas nyob Lis Xyaws tus qauv no mog.
