Nws puas tseem ceeb tias koj ntseeg dab tsi ? (What do we Believe?)
Kev nyeem ntawv ntawm peb hnub no, yog muab ntu nruab nrab hauv ntawv His Xais uas cov kws txuj faib ua 3 ntu. Lub ntsiab lus yog ntu nruab nrab uas sau kev ntseeg zoo tshaj plaws hauv Ntawv Cog Lus Qub. Cov lus uas hnub no lub Koom Txoos muab rau peb, kom tau qhia txog fab ntsuj plig tseem ceeb thiab yog qhov peb zam tsis dhau. Kuv kuj xav tias nws tseem ceeb heev rau peb nyob hauv hnub no. Li ntawd, peb sawv daws paub tias nyob hauv Ntawv Ntshiab, His Xas Lais yog haiv neeg Tswv Ntuj xaiv. Tas txhua haiv neeg hauv ntiaj teb, Tswv Ntuj xaiv haiv His Xas Lais kom tau ua yaj saub thiab ua tus tshaj lub Moo Zoo. Tab sis peb yuav muab siab rau kom peb to taub txog qhov tseeb nyob hauv Ntawv Ntshiab tias : Ntawv Ntshiab puas yog pib ntawm kev tsim haiv neeg His Xas Lais los ? Koj yuav tab meeg hais tias yog pib ntawm ntawv Hauv Paus zaj 12 los, thiab puas yog Has Nplas Has hu lawv ua haiv His Xas Lais ? Yog Has Nplas Has hu thiab qhov kawg His Xas Lais kuj yog tawm hauv Has Nplas Has tsev neeg los. Hais qhov tseeb tias : Ntawv Cog Lus Qub feem ntau yog hais txog kev tsim thiab cov His Xas Lais txoj kev mus kev hauv teb chaws suab puam. Txawm li cas kuj xij, Ntawv Ntshiab tsis yog pib nyob hauv ntawv Hauv Paus zaj 12. Ces peb yuav tig rov mus rau ntawv Hauv Paus zaj 1, koj yuav pom dab tsi txog qhov Tswv Ntuj tsim lub ntuj lub teb thiab txhua tsav puas yam. Txoj kev cawm tsis yog haiv His Xas Lais xwb, tsis yog tib neeg xwb, nws yog hais txog tas txhua yam uas Tswv Ntuj tsim tawm. Thiab ntawd yog ib feem ntawm Tswv Ntuj lub hom phiaj hauv kev cawm. Peb mus tsis tau txog haiv His Xas Lais thiab ntawv Hauv Paus zaj 12, peb tab tom hais txog As Das thiab Es Vas, Kas Ees thiab As Npes, tus pej thuam Npas Npes, Nos Hes thiab nws tsev neeg. Tas lub caij ntawd peb tsis tau hais txog His Xas Lais ib qho li, puas yog ? Peb tab tom hais txog tib neeg xwb. Vim li ntawd, As Das thiaj yog tas ntiaj teb neeg leej txiv. Tom qab dej nyab ntiaj teb, mas Nos Hes zoo li yog tus As Das tshiab thiab nws yog tas ntiaj teb neeg leej txiv, tsis yog haiv His Xas Lais leej txiv xwb. Tib neeg yog qhov ntxim Tswv Ntuj siab thiab yog qhov kuv nyiam. Qee leej hais tias yog Tswv Ntuj nrog As Das cog lus. Kuv xav tias qhov tseeb ntawm thawj cov lus cog, yog Tswv Ntuj nrog Nos Hes cog lus ua ntej yuav nrog cov His Xas Lais cog lus. Nej mloog ! Nov yog los ntawm phau ntawv Hauv Paus zaj 9. Tswv Ntuj hais rau Nos Hes thiab nws cov tub tias : “Ntawm no, kuv nrog nej cog lus cia, nrog nej thiab nrog nej caj ces puag tom qab, nrog txhua yam uas muaj txoj sia nyob, nrog cov noog, cov tsiaj nyeg, nrog txhua tsav txhua hom tsiaj hauv ntiaj teb uas tawm hauv lub nkoj los cog lus.” Thov rov saib dua ib zaug, kev nrog tib neeg cog lus thiab nrog txhua tsav puas yam uas tsim tawm, yog qhov zoo tshaj plaws ntawm Tswv Ntuj txoj kev cawm. Tam sim no Tswv Ntuj tau xaiv haiv His Xas Lais tiag tiag, uas yog pib ntawm Has Nplas Has los tau li cas ? Puas yog kom lawv tau ncaim ntawm lwm tus thiab yog qhov ntxim Tswv Ntuj siab, los puas yog kom lawv ncaim ntawm txhua leej vim kev cawm ? Tsis yog ! Raws li kuv tau piav nyob hauv ob peb lub lis piam tas los lawd tias : Tswv Ntuj xaiv haiv His Xas Lais tiag tiag, Tswv Ntuj xaiv haiv His Xas Lais xwb. Tsis yog xaiv rau Tswv Ntuj tus kheej, tab sis yog xaiv rau lub ntiaj teb neeg. Nyob hauv lub tuam tsev teev Ntuj loj nyob Yes Lus Xas Les sab nraud thiab sab hauv, muaj kev sau cov duab hais txog cov hnub qub, cov tsiaj thiab nroj tsuag txhua tsav puas yam uas Tswv Ntuj tsim. Hauv His Xas Lais txoj kev teev hawm, tas txhua tsav puas yam uas Tswv Ntuj tsim yog cav txog Tswv Ntuj raws txoj cai. Tas txhua tsav puas yam Tswv Ntuj tsim thiab yog tsim rau haiv His Xas Lais uas yog Tswv Ntuj haiv neeg. Rau tus tsim lub ntuj lub ntiaj teb thiab nyiam neeg thiab txhua tsav puas yam. Li ntawd nyob hauv Ntawv Ntshiab tsis muaj ib txoj kev teev hawm twg yog haiv neeg twg tug. Koj yuav pom tau nyob hauv lwm txoj kev teev hawm txheej thaud. Qhov kuv hais yog hais txog peb muaj Tswv Ntuj los yog peb tus Tswv Ntuj nyob hauv peb lub teb chaws. Kuv paub tias koj muaj koj tus Tswv Ntuj nyob ntawm koj thiab pov hwm koj. Koj mus nyeem nyob hauv “The Iliad” thiab “The Odyssey”, koj yuav pom tej yam no tshwm sim nyob txheej thaud tias zoo li cas. Nyias tus Tswv Ntuj ntawm txhua haiv neeg rov sib ntaus sib tua. Koj yuav pom tias muaj qee zaus lub suab nrov vig vwg ntawd yog qhov nyob ntawm Ntawv Ntshiab sab nraud. Tab sis qhov ntxim siab tiag tiag, mas yog qhov Tswv Ntuj nthuav nws tus kheej rau ntiaj teb neeg, tsis yog tus Tswv Ntuj zais ntshis nyob ib qho chaw xwb. Nws yog tus Tswv Ntuj tsim lub ntuj lub ntiaj teb tiag. Yog lawm ! Haiv His Xas Lais yog haiv neeg Ntuj xaiv, tab sis tsis yog tus yam ntxwv meem txom txawv nroog. His Xas Lais tus Tswv Ntuj yog tas ntiaj teb neeg thiab tas txhua tsav puas yam tus Tswv Ntuj. Peb txhob hnov qab thaum peb nyeem tej yam no nyob hauv Ntawv Ntshiab. Vim li cas tam sim no kuv thiaj hais li no ? Vim cov lus peb nyeem hnub no yog los ntawm His Xais zaj 45. Koj txais phau Ntawv Ntshiab thiab koj nthuav saib zaj 45, ces koj yuav pom cov lus no hais txog tus txiv neej hu ua Xais Los, Xais Los yog leej twg ? Xais Los yog tus vaj ntawm Paws Xias. Tam sim no kuv nthuav me me qhia koj ! Peb txhua tus paub zoo tias nyob hauv 587 xyoo ua ntej no, kev khiav tawm ntawm cov Npas Npis Los zaum loj tshaj tau tshwm sim. Cov Npas Npis Los thiaj mus ntaus lub xeev Yus Das. Ntawd yog cov teb chaws nyob ib puag ncig lub tuam ceeb Yes Lus Xas Les. Lawv vis tas lub tuam ceeb Yes Lus Xas Les thiab qhov kawg lawv tsoo lub nroog. Lawv hlawv lub tuam tsev teev Ntuj, lawv lwg tas txhua yam muaj nqis thiab zoo nyob hauv lub xeev Yus Das.
