Lo lus hauv lub neej lub 5 hlis 2024.
Tus tsis txawj nyiam, mas nws tsis paub Tswv Ntuj, vim tias Tswv Ntuj yog txoj kev nyiam. (1Zam 4 : 8)
Zam thawj tsab ntawv uas nws sau mus rau sawv daws thiab tsab ntawv no tau txhawb nqa peb kom peb rov qab sib raug zoo, vim nyob hauv peb tej zej zog raug cais los ntawm kev ntseeg thiab kev ua lub neej sib txawv. Zam thiaj hais kom peb nco ntsoov qhov uas nws tau tshaj txij lub hauv paus los uas yog thawj pab Thwj Tim tau ua lub neej nrog Yes Xus. Kev rov ua li no nyob hauv kev nrog Yes Xus nyob hauv peb lub neej. Peb thiaj yuav tau koom nrog thawj pab Thwj Tim ua ib tug, vim li no peb thiaj nyob hauv Yes Xus thiab Leej Txiv.
Tus tsis txawj nyiam, mas nws tsis paub Tswv Ntuj, vim tias Tswv Ntuj yog txoj kev nyiam.
Leej Ntshiab Zam tau hais rau peb tias : Tswv Ntuj xub nyiam peb, ces nws thiaj txais peb lub neej nyob hauv Yes Xus nrog rau kev txwv thiab kev tsis muaj zog. Thaum nyob saum Ntoo Cuam, Yes Xus tau qhia txog kev ncaim ntawm Leej Txiv nyob hauv nws lub suab hu tias : “Tswv Ntuj, vim li cas koj tso kuv pov tseg ?”
Yes Xus tau coj txoj kev cawm tuaj rau peb yam puv npo nyob hauv txoj kev nyiam uas tsis muaj ciaj ciam. Nws cov lus thiab txoj sia ua kom peb pom tias txoj kev nyiam tseeb tiag yog dab tsi ? Yog txoj kev nyiam uas Yes Xus coj tuaj rau peb. Peb yuav nkag siab tias kev nyiam yuav tsum siv lub peev xwm nyob hauv kev ua hauj lwm nrog kev txom nyem. Tab sis yog peb txoj kev nyiam li no, peb kuj yuav tau koom nrog Tswv Ntuj nyob ua ke thiab tau txais nws txoj kev thaj yeeb. Vim txoj kev nyiam xws li Yes Xus nyiam peb, peb thiaj nco ntsoov tias peb tau nyob thaj yeeb. Kev muab hlob yog txoj kev kaw peb qhov rooj txuas nrog peb cov txheeb ze thiab Tswv Ntuj.
Tus tsis txawj nyiam, mas nws tsis paub Tswv Ntuj, vim tias Tswv Ntuj yog txoj kev nyiam.
Tib neeg lub siab xav paub Tswv Ntuj tus tsim peb thiab xav paub kom tob tob. Peb txoj kev ntseeg qhia peb tias Tswv Ntuj yog txoj kev nyiam. Vim Tswv Ntuj txoj kev nyiam, peb thiaj ntsia pom qhov tseeb hauv txoj kev nyiam kev hlub. Nws ua kom peb muaj kev nyiam xws li Tswv Ntuj, peb yuav loj hlob nyob hauv txoj kev paub txog Tswv Ntuj. Vim peb ua lub neej nyob hauv Tswv Ntuj thiab peb mus kev hauv nws qhov pom kev. Yam no yuav ua tiav mas yog thaum kev nyiam rais ua kev nkag siab, vim peb sib nyiam sib hlub. Tswv Ntuj nyob hauv peb, zoo li 2 tug ncej hluav taws xob los nyob ua ke ua kom muaj qhov pom kev.
Tus tsis txawj nyiam, mas nws tsis paub Tswv Ntuj, vim tias Tswv Ntuj yog txoj kev nyiam.
Chiara Lubich hais tias : kev ua pov thawj tias Tswv Ntuj yog txoj kev nyiam, yog qhov rov pib dua nyob hauv lub ntuj tshiab uas tab tom ntsib kev chawj chim loj heev, xws li cov ntseeg thaum ub ua pov thawj txog yam no nyob hauv lawv txheej neeg. Peb yuav ua li no tau li cas ? Peb yuav ua lub neej raws txoj kev nyiam uas tuaj ntawm Tswv Ntuj tuaj tau li cas ? Peb yuav kawm ntawm Leej Tub thiab coj mus ua raws, kom peb muab siab rau ua hauj lwm pab luag tej. Tshwj xeeb tshaj, mas yog cov nyob ze peb. Peb pib ntawm qhov me me thiab ua neeg me, thov peb maj mam xyaum raws Yes Xus tus piv txwv uas yog pub kev nyiam kev hlub.
Tawm ntawm peb tus kheej thiab lees txais tus ntoo cuam me los sis tus ntoo cuam loj uas coj peb mus ua raws. Ces tsis ntev peb yuav mus txog txoj kev paub Tswv Ntuj, nrog Tswv Ntuj sib txuas lus, qhov pom kev, kev thaj yeeb thiab kev zoo siab nyob hauv Yes Xus uas peb xav kom muaj.
Tus tsis txawj nyiam, mas nws tsis paub Tswv Ntuj, vim tias Tswv Ntuj yog txoj kev nyiam.
Santina kheev kheev mus saib lub tsev cov neeg laus nyob uas yog lub Koom Haum Kav Tos Liv ua tus tsim. Muaj ib hnub Santina thiab Roberta uas yog nws ib tug phooj ywg ua hauj lwm ua ke, nkawd tau ntsib Aldo, uas nws yog ib tug txiv neej siab ntshuas thiab nplua nuj kawg. Aldo ntsia ntsoov ob tug poj niam ntawd thiab hais tias :
“Vim li cas koj thiaj kheev kheev tuaj ntawm no ?” Koj xav tau dab tsi ntawm kuv ? Vim li cas koj tsis cia kom kuv tuag ntsiag to mus ?
Santina tsis tu siab thiab nws hais tias : “Kuv nyob ntawm no vim koj, siv sij hawm nyob ua ke kom tau sib paub zoo thiab ua phooj ywg.”
Roberta piav tias : “Tus txiv neej ntawd nws kaw tus kheej thiab nws ntsoos kawg, nws tsis ntseeg txog Tswv Ntuj. Tsuas muaj Santina tib leeg xwb thiaj tuaj yeem txav mus ze nws tau thiab mloog nws maj mam hais lus ntev loo. Santina thov Ntuj pab thiab muab txoj Saw Mab Liab cev rau nws.”
Tsis ntev tom qab, Santina pom tias thaum nws yuav tuag, mas nws hu Santina lub npe. Nws txoj kev mob tau xaus rau kev tuag, thiab nws tuag yog tuav rawv txoj Saw Mab Liab uas Santina muab.”
