Kev paub Yes Xus ntawm ntiag tug. (Knowing Jesus Personally)
Txoj kev ntseeg yog zoo li tib txoj kev ntseeg uas hais tau tias yog lub hom phiaj, yog kev ntaus phooj ywg nrog Tswv Ntuj. Cov neeg ntseeg kheev kheev hais txog kev nrog Yes Xus sib raug zoo los yog paub txog Yes Xus ntawm ntiag tug. Qhov no yog txhais li cas tiag ? Qhov no yog qhov peb tab tom hais txog nyob hauv hnub no thiab peb yuav rov nug peb tus kheej tias : qhov no puas tsim nyog ?
Kuv xav tias tas ib tsoom neeg nyob thoob ntiaj teb, thaum lawv hnov cov neeg ntseeg hais tias : kuv tau ntsib Yes Xus thiab Yes Xus hais ntau yam rau kuv, los yog Yes Xus nrog kuv nyob. Ntshe lawv yuav xav tias kuv vwm heev rau tej yam tsis muaj qab hau. Koj yuav muaj kev sib raug zoo nrog ib tug neeg uas nws twb tuag tau 2,000 xyoo ua ntej no tau li cas ? Qhov tseeb tiag yog Tswv Ntuj, Tswv Ntuj yog tus nyob siab dua txheej huab thiab lub sij hawm. Yog tias leej twg koom nrog Tswv Ntuj ua ib tug nyob rau ib qho chaw twg, mas nws tuaj yeem hla cov txheej huab thiab lub sij hawm tau. Tam sim no kuv tab tom piav txog txhua yam. Kuv thov Ntuj rau cov tuag, los yog kuv thov Ntuj rau cov Leej Ntshiab uas lawv tau ua lub neej nyob yav tag los. Koj kuj tuaj yeem hais tau cov lus ntawd thiab. Qhov ntawd puas yog nws vwm lawm ?
Tam sim no peb yuav los tham txog Yes Xus ntxiv mus. Peb tsis tau hais txog cov Leej Ntshiab xwb, peb tab tom hais txog cov nyob hauv Tswv Ntuj. Yog Tswv Ntuj thiab yog leej tib neeg. Li ntawd, Yes Xus txoj kev nqis los ua neeg thiaj muaj qhov nyob ze Tswv Ntuj, ces peb thiaj nrog Yes Xus tham tau, vim Yes Xus yog Tswv Ntuj. Yes Xus nqis los ua neeg kuj yog nws yog Tswv Ntuj. Kuv xub pib los ntawm cov Leej Ntshiab los yog los ntawm ib tug neeg nyob hauv koj tsev neeg. Ib tug uas nws twb tau tuag mus lawm, tab sis koj tseem khaws txoj kev sib raug zoo cia thiab koj thov Ntuj rau nws, nrog nws koom siab. Kuj zoo li kuv tab tom thov Ntuj rau kuv txiv, zoo li kuv nyob hauv nws xub ntiag. Kuv thov kom nws ua tus neeg nruab nrab rau kuv tas mus li. Kuv muaj kev sib raug zoo nrog nws. Tab txawm nws twb tuag lawm ntau xyoo kuj xij, zoo ib yam li Yes Xus uas nws yog Tswv Ntuj nyob hauv neeg. Kev ntseeg tseem ceeb yog qhov tias Yes Xus tsis tau tuag, thiab nws muaj txoj sia nyob mus li tiag.
Yog lawm ! Nws yog yam tsis muaj qab hau tiag uas nrog cov neeg tuag mus lawm sib tham. Cov neeg tuag yuav nrog koj sib tham tsis tau, tab sis qhov ntawd tsis yog qhov peb ntseeg. Kuv nco txog ib lo lus nyob hauv Ntawv Ntshiab uas hais tias :
“Tswv Ntuj yog Has Nplas Has, His Xas Has thiab Yas Kos tus Tswv Ntuj.” Kuv yog hais txog cov neeg muaj txoj sia nyob hauv ntau txheej ntau tiam neeg los lawm. Lawv cov pob txha ntshe twb lwj ua hmoov tas. Kuv yog hais raws li ntiaj teb neeg. Lawv ncaim lub ntiaj teb no mus thiab tsis muaj hnub rov los. Tswv Ntuj tsis yog cov neeg tuag tus Tswv Ntuj. Tswv Ntuj yog cov neeg muaj txoj sia tus Tswv Ntuj.
Li ntawd, tsis hais Has Nplas Has, His Xas Has thiab Yas Kos. Tab yog lawv nyob hauv Tswv Ntuj, mas lawv tseem muaj txoj sia. Ces peb tuaj yeem nrog lawv sib txuas lus tau. Tas txhua yam no yog nyob hauv koj txoj kev ntseeg txog Tswv Ntuj xwb. Yog tsis muaj Tswv Ntuj, tej kev sib tham no kuj tsis muaj qab hau dab tsi. Yog muaj Tswv Ntuj thiab Tswv Ntuj muaj tiag, tas txhua yam kev sib tham nws kuj muaj tseeb ib yam li ntawd. Peb cov neeg ntseeg Kav Tos Liv tsim nyog yuav lees txais lub tswv yim no nrog qhov tseeb tias : peb yuav muab qhov no los ua kev sib haum xeeb.
Tam sim no koj paub kuv los ntawm kuv lub cev, koj paub kuv los ntawm tus cuj pwm, ntawm kuv lub suab thiab kev tawm mus ub mus no ntawm kuv. Yes Xus yog tus uas peb paub 2,000 xyoo los ntawm qhov nws nqes los ua neeg. Nws taug kev saum lub ncov roob Nkas Lis Lais. Yes Xus muaj lub cev nqaij txawv txav nyob hauv lub Koom Txoos, ces neeg paub Yes Xus los ntawm nws lub Koom Txoos.
Xas Ws ! Xas Ws ! Vim li cas koj hiam kuv ? Yam uas koj ua rau kuv cov kwv, mas kuj yog koj ua rau kuv thiab.
Yes Xus nrog peb nyob, tab sis Yes Xus lub Cev yog lub Koom Txoos. Ces txhais tias peb txoj kev nrog Yes Xus sib raug zoo yog qhov tseeb thiab yog ntiag tug. Muaj kev sib haum xeeb los ntawm lub Koom Txoos. Yam uas tseeb tiag yog kev sib raug zoo nyob hauv koj. Yes Xus hais tias : “Kuv yuav tsis hu koj ua tus qhev ntxiv lawm, kuv yuav hu koj ua kwv luag.” Cov neeg ntseeg lawv muaj lawv ib lub cim uas yog ua phooj ywg nrog Tswv Ntuj. Qhov ntawd yuav mus tau li cas, yog tias Tswv Ntuj tsis ua kom nws ua neeg nyob hauv Yes Xus, kom peb ntsia pom Yes Xus xws li Leej Ntshiab Zam thawj tsab ntawv. Koj puas paub tias peb lub ntsiab muag tau pom dab tsi ? Peb txhais tes tau kov dab tsi ? Yog qhov peb tab tom hais txog.
Tswv Ntuj xav rub peb mus ua nws li phooj ywg tiag tiag, thiab qhov no tshwm sim los ntawm qhov peb nrog Yes Xus sib ze. Koj sim xav txog Paj Lug lo lus tias :
“Yes Xus yog lub Cim ntawm Tswv Ntuj uas ntsia tsis pom.” Tswv Ntuj tsis muaj lub cev nqaij, vim Tswv Ntuj yog qhov chaw txhawv ntawm txoj sia. Tswv Ntuj tsis tshwm nyob hauv ib qho chaw twg. Yes Xus nqis los ua neeg, yog Tswv Ntuj lub Cim uas ntsia tsis pom. Yog txoj kev uas Tswv Ntuj cia rau peb nrog Yes Xus sib ze thiab ua phooj ywg tiag tiag.
Kuv pib dua hnub tshiab nyob hauv lub sij hawm ntshiab huv, thiab yog qhov tshwj xeeb uas kuv tuaj yeem tuav tau lub Cim Yug nyob hauv tsev. Kuv tawm hauv kem tsev mus, kuv xam ntawm kem tsev ib sab, kuv pom tias muaj ib kem tsev uas peb cia ua qhov chaw teev Ntuj, nyob ntawd muaj lub Cim Yug. Txhua zaus uas kuv mus hauj lwm rov los, los yog kuv mus kev deb rov los txog tsev lig. Tsaus ntuj nti kuv ntsia tsis pom qhov twg, tab sis kuv pom ib lub teeb ci ci, ces kuv paub tias Yes Xus nyob ntawd. Yes Xus nrog kuv nyob thiab nws tseeb tiag. Kuv ua dab tsi kuv tsis mus ua nyob tshav puam los nyob qhov twg, tab sis kuv ua nyob ntawm lub Cim Yug xub ntiag. Nws yog qhov tseem ceeb ntawm kev sib raug zoo uas yog kuv ntiag tug.
Pom meej tseeb nyob hauv Txiv Plig, lub thaj txi Ntuj yog qhov sib sau ntawm cov neeg ntseeg. Txiv Plig thiab Tswv Qhia yog tswv cuab ntawm lub thaj txi Ntuj thiab lub Cim Yug. Tas txhua yam nyob hauv cov kab ke ua thaj txi Ntuj, yog qhov nyob ze Tswv Ntuj tiag tiag. Tsis yog lub thaj txi Ntuj xwb, nws yog tas nrho cov Cim Ntshiab.
Lub Rooj Ncauj Lus Vas Tis Kas Ob thiaj hais tias : thaum cov me nyuam txais lub Cim Ntxuav, Yes Xus yog tus pub lub Cim Ntxuav. Leej twg kuj xij, thaum nws tau txais lub Moo Zoo ntawm kev zam txhaum, mas Yes Xus yog tus zam txhaum. Ntawd tsis tau txhais tias Txiv Plig muaj kev ncaj ncees ib yam li Yes Xus, qhov ntawd yog qhov yuam kev uas tib neeg kheev kheev xav li ntawd. Koj xav tias koj zoo npaum Yes Xus, tab sis tsis yog. Yog Txiv Plig tab tom ua cov hauj lwm xws li Yes Xus, mas yuav xav tias Yes Xus tab tom txib nws ua Yes Xus cov hauj lwm. Nws lub suab yog theej Yes Xus lub suab. Nws txhais tes yog tab tom theej Yes Xus txhais tes. Txhua zaus uas kuv nthuav ntawv Moo Zoo los yog kuv qhia kev ntseeg, tsis yog kuv ua kuv. Kuv tsis yog siv kuv lub tswv yim los hais txog txhua yam. Kuv yog tab tom ua cov hauj lwm nyob hauv Yes Xus thiab Yes Xus txib kuv ua. Qhov no yog qhov tseem ceeb tshaj ntawm kuv, hais txog kev sib raug zoo ntawm kuv ntiag tug nrog Tswv Ntuj.
Muaj ib zaug Tswv Qhia George tau hais rau kuv tias : thaum nws tseem yog tub hluas nyob hauv cov OMI, muaj tus lwm thawj tswj fab ntsuj plig qhia nws tias ; txhua txhua xyoo tsim nyog koj yuav nyeem cov ntawv hais txog Yes Xus. Koj yuav nyeem cov ntawv piav txog Yes Xus lub neej los txhawb nqa koj txoj kev xav. Koj yuav xav txog phau ntawv Life of Christ or the Lord uas yog Gordini ua tus sau. Kuv xav tias nws phau ntawv mas muaj lub ntsiab tob thiab ntxim siab. Nws yog phau ntawv hais txog cov txuj kev ntseeg thiab nkag siab txog tib neeg. Yog phau ntawv yuav ua kom koj pom kev meej tseeb tau. Tej zaum nws yuav coj kev txawj ntse hais txog qhov tob thiab kev tseeb tiag. Koj puas paub tias : tej zaum kuv yuav xav lub tswv yim hais txog cov hauj lwm Yes Xus ua. Ces phau ntawv no yuav muab cov duab ntawd los rau koj pom nyob hauv fab ntsuj plig.
Kuv nyiam thaum tab tom teev Ntuj nrog cov duab Yes Xus ntau dua cov duab thau ua si. Koj puas nkag siab tias kuv hais txog dab tsi ? Kuv muaj ib daim duab, yog daim duab zoo nkauj uas tus Tswv Qhia Os Thos Dos nyob Chicago muab rau kuv thaum nws tuaj tsham ntawm no. Kuv nyiam daim duab no heev, vim nws yog daim duab ua lub cim txog Yes Xus. Vim li cas kuv thiaj nyiam ? Vim nws yog ib daim duab txhib lub tswv yim kom xav txog Tswv Ntuj. Thaum kuv teev ntuj hauv lub thaj txi Ntuj, kuv muaj ntau daim duab hais txog Yes Xus, ces zoo li kuv tab tom nrog Yes Xus sib koom ua ke. Kev ua thwj tim coj koj mus txog kev phooj ywg, vim kuv tsis hu koj ua tus qhev, tab sis kuv hu koj ua kwv luag. Li ntawd, yuav xub pib nyob hauv kev ua thwj tim, ua raws li Tswv Ntuj txib kom ua thiab txhob nug dab tsi ntau ntau.
Yog koj ua raws li Tswv Ntuj yam kaj siab lug thiab tsis muaj kev sim, kev tiv los kev nyuab. Kuv hais tseeb rau koj tias koj tsis tau raws Yes Xus tiag tiag. Koj pib taug txoj kev ntawd, ces koj yuav pom tias Yes Xus rub koj mus ua nws phooj ywg. Ib yam li koj tus phooj ywg zoo, nws yeej tsis xav tau dab tsi ntau. Phooj ywg zoo, txhua zaus sib ntsib thiab nyob ua ke, nws yuav hais tias ; kuv yog koj tus phooj ywg tas mus li tsis hais lub caij twg thiab dab tsi yuav tshwm sim kuj xij. Qhov ntawd kuj yog qhov Yes Xus xav tau ntawm peb. Yes Xus xav kom peb ua nws ib tug phooj ywg zoo li ntawd.
Nyob hauv Nkas Las Tias zaj 5, tus neeg uas ua kom koj muaj kev kaj siab thiab ua kom koj nyiam Tswv Ntuj ntxiv, nws yog tus muaj kev sib raug zoo nrog Yes Xus tiag tiag. Hnub no peb muaj tej lo lus nug uas ntxim siab heev. Tej zaum koj yuav hnov lo lus nug los ntawm tus tub hluas no. Nws nyob His Xas Lais teb, nws yog haiv neeg His Xas Lais. Nws tsis ntseeg txog Tswv Ntuj. Tam sim no nws npaj siab xav mus txais txoj kev ntseeg Kav Tos Liv, thiab nws xav tau cov lus taw qhia los ntawm Tswv Qhia. Nws cov lus yog hais li no : “Nyob zoo Tswv Qhia Barron. Kuv hu ua Das Vis, kuv nyob His Xas Lais teb. Ua ntej no kuv ua koj ntau ntau txog koj cov hauj lwm, vim koj cov hauj lwm ua rau kuv rov xav txog kuv tus kheej thiab xav mus txais txoj kev ntseeg Kav Tos Liv. Kuv loj hlob nyob hauv ib tse neeg Os Thos Dos. Tab sis kuv tsis nyiam kev ntseeg txog Tswv Ntuj txij thaum kuv hnub nyoog muaj 20 xyoo los lawm. Kuv xav nug koj tias : kuv thiab tsev neeg peb xav khiav mus rau Nashville, hauv lub xeev Tennessee lub 7 hli no. Tab sis kuv tsis paub xaiv tias kuv yuav mus lub tsev teev Ntuj twg. Koj puas muaj ib yam uas kuv ntsia pom nyob hauv tsev teev Ntuj thiab tej yam uas kuv tsim nyog yuav zam. Thov ua koj tsaug ntau ntau thiab thov Tswv Ntuj foom hmoov zoo pub rau koj.”
Ua tsaug ntau rau lo lus nug ntawd. Thov kom Tswv Ntuj pov hwm koj txoj kev mus nyob hauv fab ntsuj plig. Nrhiav chaw ua thaj txi Ntuj thiab hwm cov kab ke mus raws Kav Tos Liv. Kev nthuav ntawv Moo Zoo kuj zoo ib yam li cov Os Thos Dos. Nrhiav cov neeg uas nyob sov siab. Zim txwv no cov neeg As Mes Lis Kas tab tom ploj ntawm lub Koom Txoos thiab ploj coob zuj zus. Qhov tseeb ntawm kev kub ntxhov zaum no, yog kev piam sij hauv kev sib xa xov. Cov lus nthuav ntawv Moo Zoo tsis raug xa mus txog ib tsoom neeg, ces lawv tsis paub tias lawv tab tom tso dab tsi pov tseg.
Li ntawd, phau ntawv Why They Follow thiaj yog phau ntawv daws kho thiab nrhiav yam ploj mus lawm rov los ua ke. Yog koj ua lub Koom Txoos cov hauj lwm, koj yog tsev teev Ntuj, yog tus coj lub Cheeb Koom Txoos, yog tus coj tsev kawm ntawv, mas koj yuav pom ntau lo lus qhia tseem ceeb nyob hauv phau ntawv no.
Thov ua tsaug ntau ntau rau nej cov mloog, peb mam sib ntsib dua lwm zaus !
