Hnub Chiv Tim 9 lub 6 Hlis 2024
Lub caij nyob nruab xyoo
Cav txog Yes Xus lub siab lub plawv/ hwm lub cim ntshiab
Mas Kos 3:20-35
“Kuv niam thiab kuv cov kwv tij nyob ntawm kuv. Leej twg ua raws li Tswv Ntuj lub siab, tus ntawd yog kuv ib leeg kwv, ib leeg muam thiab ib leeg niam.”Hnub no yog hnub chiv lub lis piam tim 10 hauv lub caij nyob nruab xyoo. Hnub no Tswv Ntuj Lo Lus caw peb sawv daws xav tswv yim txog Huab Tais Yes Xus tsev neeg. Huab Tais Yes Xus hais tias “Leej twg yog kuv niam? Leej twg yog kuv
kwv tij?”
Huab Tais Yes Xus lo lus nug hnub no caw peb kom saib ntawm lo lus “Yes Xus cov kwv tij” lub ntsiab lus. Muaj ib ib pab neeg zaum ncig Yes Xus, lawv hais rau nws tias nws niam thiab cov kwv cov muam tuaj nhriav nws. Lawv tuaj nhriav nws vim rau qhov hais tias Yes Xus cov neeg tawm tuaj ntes nws, vim lawv xav tias Yes Xus tsis meej pem lawm.cov thoob xwm kuj xav tias Yes Xus raug dab Npes Ntxes Npus. Lawv hais tias Yes Xus hu txog tus tuam thawj dab los ntiab dab tawm. Tab sis, Huab Tais Yes Xus tsis quav ntseg mus cuag lawv lawv. Tsis tas li ntawd, nws siv lub sij hawm ntawd qhia cov nyob ib puag ncig. nws nug tias “Leej twg yog kuv kwv tij? Nws nug lawv ces nws teb rau lawv paub tias “Kuv niam thiab kuv cov kwv tij nyob ntawm kuv. Leej twg ua raws li Tswv Ntuj lub siab, tus ntawd yog kuv ib leeg kwv, ib leeg muam thiab ib leeg niam.” Kwv tij zoo nyiam sawv daws, leej twg ua raws li Tswv Ntuj lub siab, tus ntawd yog Huab Tais Yes Xus ib leeg kwv, ib leeg muam ib leeg niam. Lo lus nug ntxiv mus mas “ua raws li Tswv Ntuj lub siab” yog dab tsi. Peb yuav ua li cas thiaj ua tau raws li Tswv Ntuj lub siab nyiam?
Kwv tij zoo nyiam sawv daws, Huab Tais Yes Xus tab tom ua raws li Tswv Ntuj lub siab: nws tshaj Ntuj lus, nws tshaj txog Tswv Ntuj lub Ceeb Tsheej los txog lawm, nws tshaj txoj Tswv Ntuj txoj kev nyiam, nws ntiab dab, nws kho mob, nws zam txim, nws daw txhaum, nws khuv leej cov neeg txhaum, nws tsis ua phem rau leej twg. Qhov nws ua yog qhov zoo, thaum tib neeg pom tej hauj lwm ntawd, lawv paub tias cov hauj lwm zoo no tuaj ntawm Tswv Ntuj tuaj tiag. Vim Tswv
Ntuj yog tus zoo. Tab sis mas, ib yam li peb hnov hauv lub Moo Zoo hnub no, ib txhia xav tias Yes Xus ua tej hauj lwm ntawd vim nws raug dab, nws hu txog tus tuam thawj dab los pab nws. Yes Xus hnov li ntawd, nws hais tias “Ntuj yuav zam ib puas tsav yam txhaum rau neeg tej tub ki, tsis hais tej txhaum los tej lus thuam Ntuj lawv tau tsawm. Tab sis tus twg thuam Leej Ntuj Plig Ntshiab, mas Ntuj yuav tsis zam rau nws ib zaug li: nws ua ib qho txhaum nyob mus li.” Yes Xus hais li ntawd, vim lawv hais tias: Yes Xus raug ib tug dab tsis huv. Tus coj Huab Tais Yes Xus ua hauj lwm yog Leej Ntuj Plig Ntshiab, Leej Ntuj Plig Ntshiab yog tus ua hwj huam yees ntxwv hauv Yes Xus. Lawv thuam txoj hauj lwm zoo uas Yes Xus ua kuj xws li lawv thuam Leej Ntuj Nplig Ntshiab. Kuj txhais tias lawv tsis lees txais tias Yes Xus yog Tswv Ntuj, Xes Yus tuaj ntawm Tswv Ntuj tuaj. Qhov no yog qhov txhaum loj tshaj plaws, yog ib qho txhaum nyob mus li, daw tsis tau.
Kwv tij zoo nyiam sawv daws, yog peb koom nrog Yes Xus tsev neeg, los yog peb ua Yes Xus cov kwv cov muam, peb kuj yuav tsum ua raws li nws ua, peb kuj yuav tsum ua raws li Tswv Ntuj lub siab. Lees txais tias Yes Xus tej hauj lwm tuaj ntawm Tswv Ntuj tuaj, yog lub txiv ntawm Leej Ntuj Plig Ntshiab, lees txais tias Huab Tais Yes Xus yog peb tus Tswv Ntuj.
