ZAJ NYEEM HNUB TIM 9 LUB 11 HLIS 2025
HNUB CEV LUB TUAM TSEV LAS TES LAS
COV LUS NYOB HAUV ZAM NTAWV MOO ZOO (Z 2: 13-22)
Kwv tij zoo nyiam sawv daws, hnub chiv no yogh nub cev lub tuam tsev Las Tes Las. Hnub no yog hnub tshwj xeeb uas lub Koom Txoos Kas Tos Liv caw peb sawv daws kom pom tias peb lub tsev teev Ntuj tseem ceeb zoo li cas rau cov neeg ntseeg lub neej. Lub tsev teev Ntuj yog qhov chaw uas peb tuaj nyob ua ke, teev Ntuj ua ke, hu nkauj cav txog Tswv Ntuj ua ke, ua Tswv Ntuj tsaug ua ke. Qhov tseem ceeb tias peb yuav tsum ua tej yam no ua ke vim tias peb yog hauv lub koom txoos ib yam nkaus yog lub koom txoos Kas Tos Liv. Li ntawd, thaum kev ua thaj txi Ntuj tas lawm, muaj sij hawm nrog sib tham ua ke, nrog hais lus ua ke, kuv xac tias qhov no yog qhov zoo nkauj kawg. Zoo li lub tsev Ntuj teev Ntuj nyob Khej Mes. Thaum thaj txi Ntuj tiav tas lawm, cov neeg ntseeg yuav noj khab noom, yuav haus kas fes nrog sib tham sib hais lus, uas rau cov ntseeg nyob lub tsev teev Ntuj no muaj kev sib nyiam sib hlub kawg.
Tsis tas li ntawd, muaj ib lub tsev teev Ntuj tseem ceeb uas peb yuav tsum saib xyuas kom zoo kawg, lub tsev teev Ntuj ntawd yog peb lub cev. Peb lub cev yog lub tsev teev Ntuj uas Leej Ntuj Plig Ntshiab tuaj nyob rau hauv, thiab peb lub cev tseem yog qhov chaws uas peb txais Huab Tais Yes Xus lub cev los nyob rau hauv txhua hnub chiv thaum peb txais lub cim yug thiab. Li ntawd, peb txoj hauj lwm tseem ceeb yog tias peb yuav tsum saib xyuas pe blub cev kom zoo. Huab Tais Yes Xus tsis nyiam yog peb lub cev tsis huv tsis zoo. Zoo ib yam li nws hais hauv lub Moo Zoo hnub no: “Nej tshem tej ntawd tawm hauv no mus. Nej tsis txhob muab kuv Txiv lub Tsev los ua ib lub tsev ua luam ntxiv.” Cov kwv tij, peb tsis cev tsis yog khoom tiam sis yog qhov chaws ntshiab huv uas Tswv Ntuj nyob, li ntawd thov kom peb saib xyuas peb lub cev ib txwm kom huv kom tsis muaj kev tsis zoo, kom tsis muaj txhaum mog thiaj tsim nyog tos txais Tswv Ntuj tuaj nyob rau hauv lub tsev.
Nyob zoo sawv daws.
