Hnub Chiv Tim 7 Lub 4 Hlis 2024
Lub Caij Hla
Zam Ntawv Moo Zoo 20:19-31
“Peb pom Huab Tais lawm.”
Tom qab Huab Tais Yes Xus tuag ces nws sawv rov los lawm, Yes Xus cov thwj tim tseem tu siab thiab lawv ntseem ntshai cov Yus Das kawg. Lawv lub siab tsis nyob kaj lug kiag li. Lawv thiaj li kaw tas qhov rooj hauv qhov chaw lawv nyob. Lawv tseem tsis tau paub tias Huab Tais Yes Xus sawv rov los lawm. Lawv tsis tau to taub tias kev sawv rov los yog dab tsi, kev sawv rov los muaj txoj sia tshiab yuav zoo li cas. Lawv tsis nkag siab tiag tiag li.
Hnub no, Yes Xus los sawv hauv nruab nrab lawv, nws hais lus “nyob kaj lug” rau lawv kom lawv muaj kev vam khom, kom lawv muaj kev vam thiab kom lawv muaj siab nyob kaj lug. Tsis tas li ntawd, Yes Xus muab txoj hauv lwm tseem ceeb rau lawv “kuv xa nej mus xws li Leej Txiv xa kuv tuaj,” yog tias nws xa lawv mus tshaj rau sawv daws paub tias lawv tau pom Huab Tais Yes Xus tus Sawv Rov Los lawm. Lawv yuav tsum mus xa moo tshaj tawm txog Yes Xus kev sawv rov los muaj txoj sia tshiab. Tswv Ntuj Lo Lus uas Yes Xus tshaj tawm 3 xyoo dhau los hnub no yog qhov tseeb lawm.
Kwv tij hmoob sawv daws, kuv nyiam Tswv Ntuj Lo Lus cov no kawg hais tias “Peb pom Huab Tais lawm.” Lo Lus no muaj lub ntsiab lus tob tshaj vim rau qhov hais tias nws hais txog peb txoj kev ntseeg txog Yes Xus. Thaum peb tshaj tawm tias “kuv pom Huab Tais lawm” ntawm peb qhov ncauj lawm ces, txhais tias peb ntseeg txog Yes Xus tiag tiag. Tsis yog lub Koom Txoos Kas Tos Liv yuam peb kom tshaj “peb pom Huab Tais lawm,” tsis yog Txiv Plig los Xwb Hwb los leej twg yuam yus kom tshaj tawm li ntawd, tab sis mas, yog yus tus kheej xwb, yus tshaj yus hauv yus lub neej xwb tias “kuv pom Huab Tais lawm” kuj txhais tias yus tau pom Huab Tais tiag tiag hauv yus lub neej, yus thiaj muaj txoj kev ntseeg txog Yes Xus. Qhov no yog txoj kev ntseeg tseem ceeb tshaj plaws. Thov peb sim saib ntawm Tos Mas. Thaum lwm cov thwj tim hais rau nws tias “Peb tau pom Huab Tais lawm,!” ces nws tsis ntseeg lawv. Nws hais tias yog nws tsis pom thiab tsis muab nws tus ntiv tes ntxig lub qhov ntsia hlau, mas nws tsis ntseeg. Tsis muaj leej twg yuam yus kom ntseeg tau, yog ntawm yus tus kheej xwb thiaj ntseeg tau, nyob ntawm yus lub siab xwb, yus yuav ntseeg los tsis ntseeg, puas yog kwv tij sawv daws.
Cov kwv tij hmov thiab tshua sawv daws, nej puas paub tias peb txoj hmoov zoo? Peb txoj hmoov zoo kuj vim tias peb tau mloog Tswv Ntuj Lo Lus, peb tau paub Yes Xus yog leej twg, Tswv Ntuj yog leej twg. Peb muaj sij hawm zoo uas peb tau hnov lub Moo Zoo. Peb txoj hmoov zoo uas peb lub hom phiaj ntawm peb lub neej yog kev vam kev cia siab rau kev sawv rov los. Vam thiab cia siab tias muaj ib hnub thaum txoj sia nyob ntiaj teb no tas lawm, peb yuav sawv rov qab los nrog Tswv Ntuj nyob mus li. Tseem muaj coob leej tsis tau peb Tswv Ntuj, tseem muaj coob leej tsis tau paub Yes Xus kev sawv rov los, tseem muaj coob leej tsis tau “pom Huab Tais.” Lawv tsis muaj sij hawm mloog Tswv Ntuj Lo Lus. Peb yuav tshaj tawm rau lawv paub puas tau? Peb yuav coj lawm mus “pom Huab Tais” puas tau?
Txhob tsis nco qab, hnub no, Huab Tais Yes Xus hais dab tsi rau nws cov thwj tim. Thaum lawv pom Huab Tais lawm, Nws hais rau lawv tias “kuv xa nej mus.” Huab Tais muab txoj hauj lwm tseem ceeb rau peb ua, nws xa peb, cov ntseeg sawv daws mus tshaj kom luag tej paub Tswv Ntuj. Kwv tij sawv daws, nej puas xav ua raws li nws thov?
“Peb pom Huab Tais lawm.” “Nej nyob kaj lug mog!”
