Hnub Chiv tim 6 lub 7 Hlis 2025
Lub Caij Nyob Nruab Xyoo
Lub lis piam 14
Lus Kas 10: 1-12, 17-20
“Qoob loo zoo sau muaj ntau kawg, tab sis cov tub zog muaj tsawg.”
Nyob zoo…
Hauv lub Moo Zoo peb mloog hnub no, Huab Tais Yes Xus xaiv 72 leeg thwj tim, nws xa lawv mus tej pab ob leeg kom tshaj rau tsoom neeg paub tias “Tswv Ntuj lub Ceeb Tsheej tuaj txog ze lawv lawm.” Huab Tais Yes Xus xa nws cov thwj tim mus tej pab ob leeg kom lawv ua tim khawv txog lub Moo Zoo. Hnub no, Huab Tais Yes Xus hais cov lus tseem ceeb kom peb khaw cia twm txog kom zoo. Huab Tais Yes Xus hais tias “Qoob loo zoo sau muaj ntau kawg, tab sis cov tub zog muaj tsawg.” Huab Tais Yes Xus hais li no ua kom peb paub tias cov kub siab rau siab ua Tswv Ntuj txoj hauj lwm muaj tsawg kawg. Tsis muaj leej twg xav ua, vim tias ua txoj hauj lwm no, yus yuav tsum nrauj yus tus kheej tiag tiag. Yus yuav tsum “sacrifice” “เสียสละ” los faib yus tus kheej, faib yus lub sij hawm rau Tswv Ntuj txoj hauj lwm. Li ntawd, tsis tshua muaj coob leej xa ua Tsw Ntuj txoj hauj lwm. Ib txhia xav tias cov tub zog uas Huab Tais Yes Xus hais txog yog cov tswv qhia, cov leej choj, cov leej phauj, los cov xib hwb xwb. Qhov tiag mas, tsis yog li ntawd. Peb cov neeg ntseeg sawv daws yog cov tub zog, yog peb xav ua Tswv Ntuj cov tub zog, yog peb xav nrauj yus tus kheej ua Tswv Ntuj txoj hauj.
Hauv lub tsev teev Ntuj muaj cov thawj coj, cov txiv tsev, cov niam tsev, cov hu nkauj, cov no yog Yes Xus cov thwj tim, lawv yog Tswv Ntuj cov tub zog. Peb cov ntseeg sawv daws yog Tswv Ntuj cov tub zog, peb txoj hauj lwm yog tias peb yuav tsum pab sau Tswv Ntuj cov qoob. Zoo li Huab Tais Yes Xus hais tseg: “peb yuav tsum thov tus Tswv qoob kom nws za ib co tub zog tuaj sau nws cov qoob.” Peb yog Tswv Ntuj cov tub zog, peb yuav tsum pab Tswv Ntuj ua hauj lwm tshaj Ntuj Lus, peb yuav tsum npaj Tswv Ntuj txoj kev kom txhij, kom sawv daws paub Tswv Ntuj, peb yuav tsum pab kom luag pom tias yog Tswv Ntuj tib leeg xwb thiaj cawm peb tau. Peb yuav tsum ua neej ua piv txwv zoo kom luag pom thiaj yuav lub siab tshiab los ntseeg Ntuj, los ua Tswv Ntuj cov me nyuam.
Li ntawd, hnub no, kuv thov ua nej tsaug, cov thawj coj hauv lub tsev teev Ntuj, cov niam tsev, cov hluas, cov xib hwb, cov neeg ntseeg uas nej pab lub tsev teev Ntuj. Nej pab cov txiv plig ua hauj lwm tshaj Ntuj Lus, nej muab siab rau lub Koom Txoos txoj dej num. Thov nej sawv daws ua siab loj. Yog muaj teeb meem dab tsi los tej zaum mas nej khwv khwv vim Tswv Ntuj txoj hauj lwm, kuj thov Tswv Ntuj foom hmoov zoo rau nej txhua leej txhua tus. Huab Tais Yes Xus cog lus tias yog nej ua tub zog pab Tswv Ntuj ua hauj lwm tshaj Ntuj Lus, mas “tsis muaj dab tsi ua xwv txheej tau rau nej.” Tswv Ntuj yog tus pov hwm nej. Nyob zoo sawv daws
