Hnub Chiv Tim 6 Lub 4 Hlis Ntuj 2025
Lub Caij Plaub Caug 5
Zam 8:1-11
“Kuv kuj tsis muab txim rau koj thiab. Koj rov mus, txij no mus koj txhob ua txhaum ntxiv lawm mog.”
Nyob zoo…
Kwv tij hmoob sawv daws, peb tab tom nyob hauv lub caij Plaub Caug lub lis piam 5, lub lis piam yav tom ntej, peb yuav nkag mus hauv lub lis piam Ntshiab lawm los yog hnub chiv nqaum nplooj lawm. Tsis ntev, peb yuav ua hmoov tsuj xeeb Yes Xus sawv rov los lawm. Thov kom peb npaj siab npaj ntsws kom zoo mog. Lub Moo Zoo hnub no, caw peb kom pom tseeb tias Tswv Ntuj lub siab nyiam tib neeg npaum li cas, Tswv Ntuj lub siab khuv leej cov neeg txhaum npaum li cas? Thiab kom peb paub tias thaum Tswv Ntuj hlub peb thiab khuv leej peb lawm, ces peb yuav tsum ua neej zoo li cas thiaj phim rau Tswv Ntuj, peb thiaj tsim nyog ua Tswv Ntuj cov me tub me nyuam.
Hauv lub Moo Zoo hnub no, peb pom tias tib neeg nyiam muab txim rau luag kawg. Tib neeg nyiam txiav txim rau luag, tiam sis tsis nyiam txiav txim rau yus tus kheej. Zoo li hauv lub Moo Zoo hnub no, cov kws ntawv thiab cov Fas Lis Xais coj ib tug poj niam ua txhaum tuaj rau Yes Xus kom nws txiav txim, muab txim rau tus poj niam no. Kwv tij sawv daws, kuv nyiam Yes Xus lo lus teb tshaj. Huab Tais Yes Xus teb rau lawv tias “Nyob hauv nej, yog leej twg tsis muaj txhaum, mas kom nws xub txawb ib lub pob zeb rau tus poj niam ntawd.” Cov kwv tij, Huab Tais Yes Xus hais yog kawg, nws hais tseeb kawg. Tus twg tsis muaj txhaum, los tus twg tsis tau ua txhaum hauv nws lub neej, mas kom nws txiav tau txim rau luag, kom nws muab tau txim rau luag. Yog lawm mas, qhov tiag mas, tsis muaj tus twg tsis muaj txhaum. Peb sawv daws muaj txhaum, li ntawd, peb tsis muaj cai txiav txim rau luag. Tsuas yog Tswv Ntuj xwb thiaj muaj cai txiav txim los zam txim. Li ntawd, mas peb txhob muab txim los txiav txim rau luag. Saib, thaum cov kws ntawv thiab cov Fas Lis Xais hnov Huab Tais Yes Xus hais li ntawd, lawv nyias rov mus nyias zuj zus. Cov xub mus yog cov laus dua. Shuav Yes Xus tib leeg thiab tus poj niam ntawd xwb. Lawv nyias rov mus nyias zuj zus kuj vim rau qhov hais tias lawv paub tseeb paub meej tias, lawv kuj muaj txhaum, lawv kuj yog neeg txhaum, lawv kuj ua txhaum zoo li tus poj niam ntawd thiab. Lawv paub tseeb tias lawv tsis muaj cai los muab txim rau tus poj niam ntawd.
Lo lus qhia tseem ceeb tshaj plaws hauv zaj no tsis yog kev muab txim rau luag, los kev txiav txim rau luag, tiam sim yog kev khuv leej ntawm Tswv Ntuj rau neeg txhaum zoo li peb. Tswv Ntuj hlub peb kawd, Tswv Ntuj thiaj khuv leej peb cov neeg txhaum. Nco ntsoov kom meej tias “Tswv Ntuj nyiam peb yog qhov tias thaum peb tseem yog neeg txhaum.” Huab Tais Yes Xus “tsis tuaj hu cov neeg ncaj. Huab Tais Yes Xus tuaj hu cov neeg txhaum kom tig los yuav lub siab tshiab.” Li ntawd, mas hnub no thaum tshuav Yes Xus tib leeg thiab tus poj niam ntawd xwb, Huab Tais Yes Xus khuv leej nws, Yes Xus hais tias “Kuv kuj tsis muab txim rau koj thiab. Koj rov mus, txij no mus koj txhob ua txhaum ntxiv lawm mog.”
Kwv tij zoo nyiam sawv daws, lub sij hawm no yog lub sij hawm uas peb yuav saib ntawm yus tus kheej, tsis yog saib ntawm luag qhov txhaum qhov tsis zoo. Hnub no, peb tau ntsib Huab Tais Yes Xus lawm, hauv thaj txi Ntuj peb tau ntsib nws, peb tau txais nws lawm, Huab Tais khuv leej peb thiab. Thov kom peb rov mus, yuav lub siab tshiab, thiab txhob ua txhaum ntxiv lawm.
Hnub no, Huab Tais Yes Xus kuj hais rau peb sawv daws thiab, “Kuv kuj tsis muab txim rau koj thiab. Koj rov mus, txij no mus koj txhob ua txhaum ntxiv lawm mog.”
