ZAJ NYEEM HNUB TIM 30 LUB 9 HLI 2024
HNUB NCO TXOG LEEJ NTSHIAB ZES LAUS
COV LUS NYOB HAUV LUS KAS NTAWV MOO ZOO (LK 9: 46-50)
Kwv tij Hmoob sawv daws, hnub no lub Koom Txoos nco txog Leej Ntshiab Zes Laus. Ua ntej peb yuav los xav txog lub Moo Zoo hauv hnub no mas peb yuav tham me ntsis txog Leej Ntshiab Zes Laus tso tias nws yog leej twg?
Leej Ntshiab Zes Laus yog tus txhais phau Ntawv Ntshiab xeem lus Hes Las thiab lus Hes Nplaws los ua lus Las Tis Nas. Leej Ntshiab Zes Laus hais tias ‘tus neeg twg tsis paub Ntawv Ntshiab mas nws yuav tsis paub Huab Tais Tswv Ntuj.’
Cov kwv tij, lub Moo Zoo nej hnov hauv hnub no muaj 2 zaj; yam li zaj ib mas Huab Tais Yes Xus ntuas cov thwj tim kom txais cov me nyuam, thiab zaj ob mas Huab Tais Yes Xus ntuas cov thwj tim kom txhob txwv cov neeg hu txog Yes Xus lub npe los ntiab dab.
Ob zaj no puav leej zoo qhia peb sawv daws kom qhib siab thiab muab lub siab nthuav kom dav rau sawv daws.
Huab Tais Yes Xus xav kom peb qhib siab txais cov neeg me, cov neeg tsis tseem ceeb tuaj cuag peb. Vim nyob hauv cov Yus Das mas lawv saib tej me nyuam tsis muaj nqi dab tsi, lawv tsis yuav tej me nyuam tej zaj lus; mas hnub no Huab Tais Yes Xus thiaj tab meeg ua rau lawv pom tias lawv yuav tsum qhib siab thiab saib cov me nyuam muaj nqi ib yam li cov hluas los cov laus.
Kwv tij, nyob hauv Hmoob lub neej mas muaj ntsis zoo li cov Yus Das, Hmoob tsis tshua yuav cov me nyuam tej lus, Hmoob tsis tshua vam txog cov me nyuam. Hmoob nyiam hais rau cov me nyuam tias ‘txav mus, tej no tsis yog nej tej hauj lwm’, los hais tias ‘kav tsij mus ua si, txhob los khuam khuam kev’.
Kom peb nco ntsoov tias Huab Tais Yes Xus saib sawv daws muaj tsim ib yam. Huab Tais Yes Xus xav kom peb saib sawv daws loj sib luag.
Huab Tais Yes Xus qhia kom peb nthuav lub siab kom dav, txhob tshwj Tswv Ntuj lub txiaj ntsim tseg cia rau peb pab pawg xwb, txhob txiav txim rau lwm pab pawg tias lawv cov hauj lwm ua zoo tsis yog tuaj ntawm Tswv Ntuj tuaj. Peb yog me nyuam neeg xwb mas peb tsis paub.
Thaum peb pom lwm pab pawg neeg los lwm txoj kev teev hawm ua qhov zoo mas peb txhob txwv lawv, cia lawv ua mus raws li lawv ua tau. Ntawm peb, mas pe kuj yuav ua raws li peb ua tau. Cia nyias ua nyias.
Zaj no zoo qhia peb cov ntseeg tsis hais nyob hauv lub Koom Txoos twg los xij, yog peb xav sib haum xeeb mas peb tsis txhob hais lus sib tiv, peb tsis txhob sib thuam, peb tsis txhob hais tias kuv li thiaj yog hos koj li mas tsis yog. Cia nyias ua nyias mus raws li nyias lub Koom Txoos qhia.
