Hnub Chiv tim 30 Lub 6 Hlis Ntuj 2024
Lub Caij Nyob Nruab Xyoo
Mas Tais 16:13-19
“ Nej ne, nej hais tias kuv yog leej twg?”
Nyob zoo…
Hnub no lub Koom Txoos nyob Thaib teb ua hmoov nco txog Leej Ntshiab Pob Zeb thiab Paj Lug. Ob tug Leej Ntshiab no yog cov thawj coj tseem ceeb hauv npawg ntseeg Yes Xus yav ua ntej. Yes Xus tsa Pob Zeb sawv nws chaws coj cov thwj tim thiab cov neeg ntseeg. Yes Xus txhim nws lub Koom Txoos nyob saum lub pob zeb no. Pev cov ntseeg Catholic ntseeg tias Pob Zeb yog tus sawv Yes Xus chaws thiab tus sawv nws chaws ntxiv los yog Vaj Qhia. Niaj hnub nyem no Vaj Qhia Francis yog tus sawv Pob Zeb chaws. Qhov no muaj lub ntsiab tias nws yog tus sawv Yes Xus chaws. Vim li ntawd peb yuav tsum mloog nws cov lus qhia.
Paj Lug yog tus tshaj Ntuj lus rau lwm haiv neeg. Nws yog tus ua kom lub Koom Txoos nthuav mus deb thiab ua kom muaj cov ntseeg coob tuaj. Ob tug Leej Ntshiab no thiaj yog ob tug neeg tseem ceeb ua kom kev ntseeg los txog peb.
Ob tug leej Ntshiab no tau teb rau Yes Xus lo lus nug tias “koj hais tias, kuv yog leej twg?” Pob Zeb thiab Paj Lug tsis teb Yes Xus ntawm qhov ncauj xwb, nkawd raws Yes Xus qab, ua raws li nws qhia. Nkawd ua tim khawv txog Yes Xus rau cov His Xas Lais thiab lwm haiv neeg kom paub tias “Yes Xus yog Leej Pleev, yog tus Tswv Ntuj Muaj Txoj Sia Leej Tub.” Nkawd lub neej ua piv ntxwv rau peb cov ntseeg sawv daws kom ua raws, vam thiab cia siab tias, peb sawv daws thiab kuj yuav ua tim khawv rau luag tej paub txog Yes Xus thiab.
Kwv tij hmoob sawv daws, hauv txoj kev ntseeg no, peb tau hnov coob leej hais txog kev ntseeg txog Yes Xus, qhia txoj Yes Xus lub neej ua ub ua no thiab ntaum yam…hais tsis tag! Ces Yes Xus kuj hais rau peb txhua tug tias “ua li nej ne, nej hais tias kuv yog leej twg?” Ntawm peb mas, Yes Xus yog leej twg? Peb los ntseeg txog Tswv Ntuj, peb los ntseeg txog Yes Xus lawm ces, Yes Xus txhais li cas rau peb, nws muaj nqis dab tsi rau peb? Peb yuav tsum nyias teb nyias hais tias Yes Xus yog leej twg ntawm yus tus kheej raws li yus tau ntsib Yes Xus hauv yus lub neej. Tsis muaj leej twg yuav sawv chaws teb yus tau? Vim yog tias, txoj kev ntseeg no yog yus lub neej ntawm yus tus kheej thiab Yes Xus. Kuv ntseeg tias tus tau ntsib Yes Xus yuav teb zoo li Pob Zeb, “Yes Xus, koj yog Leej Pleev, yog tus Tswv Ntuj muaj txoj sia nws Leej Tub.”
Thov Tswv Ntuj foom koob foom hmoov rau nej sawv daws kom nej sawv daws muaj kev ntseeg nruaj nreb mog!
