Hnub Chiv Tim 30 Lub 3 Hlis Ntuj 2025
Lub Caij Plaub Caug 4
Lus Kas 15:1-3, 11-32
“Tus neeg ntawd txais cov neeg txhaum, nws tseem nrog lawv noj mov thiab.”
Nyob zoo…
Kwv tij zoo nyiam sawv daws, hnub no yog hnub chiv hauv lub lis piam 4 lub caij Plaub Caug. Peb npaj peb tus kheej zoo li cas lawm? 2-3 lub lis piam yav tas los, peb yuav lub siab tshiab los nrhiav Tswv Ntuj tau li cas? Lub Koom Txoos thov kom peb saib ntawm yus tus kheej, teev Ntuj, pub dawb rau luag, thiab yoo mov, kom peb siv lub sij hawm no los npuab Tswv Ntuj, los nyob ze Tswv Ntuj.
Hauv lub Moo Zoo hnub no, peb hnov Huab Tais Yes Xus hais zaj paj lug txog tub loj leeb rov los tsev. Hauv zaj paj lug no muaj 3 tug neeg ua piv txwv tseem ceeb rau peb. 3 tug no yog tus txiv, tus tub ntxawg, thiab tus tub hlob.
Tus tub ntxawg tsis txaus siab ntawm nws lub neej, nws thov kom leej txiv muab lub cuab tam feem uas yog nws tug faib rau nws, ces nws khiav mus ib lub teb chaws deb deb. Huab Tais Yes Xus hais ntxiv tias “nyob ntawd, tus tub ntxawg coj ib lub neej tsis tsim txiaj. Nws tshaib plab, tab sis tsis muaj neeg pub rau nws noj. Kwv tij sawv daws, tus tub ntxawg coj lub neej tsis tsim txiaj, tiam sis nws yuav lub siab tshiab, nws thiaj sawv kev rov los cuag nws txiv, thov txim thiab lees txhaum. Nws paub tiag nws yog neeg tsis zoo, nws ua tsis zoo rau nws txiv, nws tu siab rau qhov txhaum ntawd.
Tus txiv sawv cev Leej Txiv Tswv Ntuj. txawm tias nws tus tub ua txhaum ua tsis zoo rau nws npaum li cas, nws kuj zam txim rau nws me tub me nyuam vim Tswv Ntuj khuv leej lawv. Yog lawv tu siab tiag tiag rau lawv qhov txhaum. Tus txiv tsis muab txim rau nws tus tub ntxawg, tsis tas li ntawd, thaum leej txiv pom tus tub tseem los txog deb, leej txiv hlub kawg, nws khiav mus puag tus tub caj dab, thiab nwj nws tus tub ntev loo. Kwv tij sawv daws, ntawm peb mas, Leej Txiv Tswv Ntuj kuj yuav ua li ntawd thiab. Yog peb rov qab los nrhiav Tswv Ntuj, thaum peb tseem nyob deb, Leej Txiv Tswv Ntuj yuav khiav mus puag peb thiab, vim peb yog Tswv Ntuj cov tub cov ntxhais thiab.
Ntawm tus tub hlob, mas nws yog tus ua raws li leej txiv lo lus, nws tsis tau hla leej txiv ib lo lus li, nws mloog leej txiv lus. Nws ua lub neej zoo, tiam sis, nws khib siab, nws tsis txaus siab uas nws txiv hlub nws tus kwv, nws npau taws uas nws txiv khuv leej nws tus kwv. Kwv tij zoo nyiam sawv daws, tus tub hlob hauv zaj paj lug no ua piv txwv zoo rau peb tias kev ua Tswv Ntuj me tub me nyuam, kev ua lub neej nyob hauv Tswv Ntuj tsis yog hais tias yus ua raws li Ntuj Lo lus qhia xwb, tsis yog hais tias yus tsis tau hla Tswv Ntuj 10 Lo Lus Qhia los Lub Koom Txoos Kas Tos Liv kab lis kev cai xwb, ces yus ua txaus lawm. Qhov tiag mas, Tswv Ntuj lo lus qhia loj yog kev sib nyiam sib hlub, peb yuav tsum hlub lwm tus, zam txim rau cov ua tsis zoo rau peb, peb yuav tsum khuv leej cov neeg txhaum, cov neeg uas tsis muaj leej twg nyiam lawv los xav pab lawv. Qhov no yog yam uas Tswv Ntuj xav kom peb rau luag, rau tib neeg zoo li peb, cov neeg txhaum zoo li peb. Yog peb ua lub neej tsis hla Ntuj txoj cai los Ntuj 10 Lo Lus Qhia, kuj ua tsis nyuaj, tiam sis yog peb ua neej hlub lwm tus, qhov no tsis yooj yim kiag li.
Thov kom peb npaj yus tus kheej hauv lub caij plaub caug no kom zoo mog!
