Hnub Chiv Tim 27 Lub 4 Hlis 2025
Lub Caij Hla
Zam Ntawv Moo Zoo 20:19-31
“Kuv tus Huab Tais, Kuv tus Tswv Ntuj.”
Nyob zoo…
Tom qab Huab Tais Yes Xus tuag ces nws sawv rov los lawm, Yes Xus cov thwj tim tseem tu siab thiab lawv ntseem ntshai cov Yus Das kawg. Lawv lub siab tsis nyob kaj lug kiag li. Lawv thiaj li kaw tas qhov rooj hauv qhov chaw lawv nyob. Lawv tseem tsis tau paub tias Huab Tais Yes Xus sawv rov los lawm. Lawv tsis tau to taub tias kev sawv rov los yog dab tsi, kev sawv rov los muaj txoj sia tshiab yuav zoo li cas. Lawv tsis nkag siab tiag tiag li.
Hnub no, Yes Xus los sawv hauv nruab nrab lawv, nws hais lus “nyob kaj lug” rau lawv kom lawv muaj kev vam khom, kom lawv muaj kev vam thiab kom lawv muaj siab nyob kaj lug. Tsis tas li ntawd, Yes Xus muab txoj hauj lwm tseem ceeb rau lawv “kuv xa nej mus xws li Leej Txiv xa kuv tuaj,” yog tias nws xa lawv mus tshaj rau sawv daws paub tias lawv tau pom Huab Tais Yes Xus tus Sawv Rov Los lawm. Lawv yuav tsum mus xa moo tshaj tawm txog Yes Xus kev sawv rov los muaj txoj sia tshiab. Tswv Ntuj Lo Lus uas Yes Xus tshaj tawm 3 xyoo dhau los hnub no yog qhov tseeb lawm. Thaum peb tshaj tawm tias Huab Tais Yes Xus sawv rov los lawm, kuj txhais tau tias kev tuag tsis yog qhov kawg ntawm tib neeg lub neej. Peb tseem muaj vam thiab kev cia siab rau Huab Tais Yes Xus. Thaum peb ntseeg txog nws, hnub kawg, peb kuj yuav nrog nws sawv rov los muaj txoj sia tshiab thiab.
Hauv lub Moo Zoo hnub no, peb paub tias ua ntej Tos Mas yuav pom Huab Tais Yes Xus, nws tsis ntseeg txog Yes Xus kev sawv rov los. Tiam sim, thaum Yes Xus tawm tuaj rau nws pom thiab hais rau nws kom cev ntiv tes ntxig Yes Xus lub qhov ntsia hlau, Tos Mas thiaj li ntseeg. Nws hais tias “Kuv tus Huab Tais, Kuv tus Tswv Ntuj.” Tos Mas cov lus “Kuv tus Huab Tais, Kuv tus Tswv Ntuj” yog peb cov lus lees txais Yes Xus yog peb tus Huab Tais, Yes Xus yog peb tus Tswv Ntuj thiab. Ntawm peb mas, peb puas muaj lub sij hawm twg uas peb tau pom Huab Tais Yes Xus hauv peb lub neej, peb paub tias yog Tswv Ntuj tiag, ces peb lees txais Huab Tais Yes Xus yog peb tus Tswv Ntuj zoo xws li Tos Mas tau lees txais nws. Txawm tias peb tsis pom Huab Tais Yes Xus ntawm peb qhov muag, tiam sim peb tau pom Huab Tais Yes Xus ntawm peb txoj kev ntseeg. “Cov uas tsis tau pom tab sis lawv ntseeg, mas lawv txoj hmoov zoo.”
