Hnub Chiv Tim 26 Lub 5 Hlis 2024
Lub Caij Nyob Nruab Xyoo
Mas Tais 28:16-20
“Nej hu txog Leej Txiv, Leej Tub thiab Leej Ntuj Plig Ntshiab lub npe, nej ntxuav lawv.”
Hnub chiv no yog hnub hwm Peb Leeg Huab Tais. Lub Koom Txoos Kas Tos Liv caw peb kom xav tswv yim txog cov lus uas Huab Tais Yes Xus hais rau nws cov thwj tim thaum nws xa lawv mus ua hauj lwm tseem ceeb, hais tias “nej hu txog Leej Txiv, Leej Tub thiab Leej Ntuj Plig Ntshiab lub npe.”
Kwv tij sawv daws, Leej Txiv, Leej Tub thiab Leej Ntuj Plig Ntshiab yog qhov pib ntawm peb txoj kev ntseeg. Thaum peb txais lub Cim Ntxuav peb txais hauv Leej Txiv, thiab Leej Tub thiab Leej Ntuj Plig lub npe. Thaum peb pib kawm Tswv Ntuj cov lus qhia, peb pib ua ntoo cuam lub cim “hu txog Leej Txiv, thiab Leej Tub, thiab Leej Ntuj Plig lub npe. Amen.” Thaum peb pib teev Ntuj tsis hais ua ntej noj mov los noj mov tas lawm, peb ua ntoo cuam lub cim. Kwv tij sawv daws nej xav li cas, ua cas ho peb thiaj Peb Leeg Huab Tais ntau ntau zaus?
Thaum peb ua ntoo cuam lub cim peb hu txog Leej Txiv thiab Leej Tub thiab Leej Ntuj Plig lub npe, peb tsis ua lub cim ntawm lub Koom Txoos Kas Tos Liv xwb, los peb ua ua xwb tab sis tsis to taub lub ntsiab lus. Tsis yog! Thaum peb hu txog Peb Leeg Huab Tais peb tab tom ras txog Tswv Ntuj kev nyiam kev hlub. Peb tab tom muab yus tus kheej tag nrho rau hauv Tswv Ntuj txoj kev nyiam kev hlub. Vim rau qhov hais tias Tswv Ntuj uas yog Peb Leej Huab Tais: Leej Txiv, Leej Tub, Leej Ntuj Plig yog kev nyiam, yog kev sib koom. Huab Tais Yes Xus hais tias “qhov yuav ua kom sawv daws paub tias nej yog kuv cov thwj tim, yog qhov no: nej sib nyiam sib hlub.” Tos Peb Leeg Huab Tais koom ua ib tug Tswv Ntuj hauv txoj kev nyiam kev hlub, peb thiaj li sib nyiam sib hlub xws li peb tus Tswv Ntuj. Vaj Qhia Francis hais tias qhov no yog kev tsis sib haum xeeb, yog ib tug Christian los ib tug neeg ntseeg txog Tswv Ntuj yuav ntxub luag tej.
Ua li ntawd mas, thaum Huab Tais Yes Xus xa nws cov thwj tim mus tshaj Ntuj Lus, nws xa lawv mus hauv Peb Leeg Huab Tais txoj kev hlub. Lawv yauv tsum ua tim khawv txog txoj kev hlub, thiab kev sib zam txim, tsis yog txoj kev ntxub los txoj kev sib cav sib ceg.
Tej zaum ib txhia hais tias cov lus qhia txog Peb Leeg Huab Tais tsis yooj yim, nyuaj kawg, tsis to taub kiag li. Thov kom peb paub tias qhov tseem ceeb tshaj plaws yogh ais tias Peb Leeg Huab Tais: Leej Txiv, Leej Tub thiab Leej Ntuj Plig Ntshiab sib koom ua ib tug Tswv Ntuj hauv txoj kev nyiam kev hlub. Hauv Zam tsab Ntawv ib, zaj 4:16 hais tias: Tswv Ntuj yog txoj kev nyiam: tus twg nyob hauv txoj kev nyiam, mas nws kuj nyob hauv Tswv Ntuj, thiab Tswv Ntuj nyob hauv nws.”
Cov kwv tij hmov thiab shua, Ua li ntawd, Peb Leeg Huab Tais yog qhov uas txhua tsav txhua yam txhawv tawm los. Kev nyiam kev hnub ntawm Peb Leeg Huab Tais ua rau txhua tsav txhua yam tshwm sim tuaj tau tsis tib neeg, tsis hais tsob ntoo, tsis hais cov tsiaj thiab lwm yam. Vim li ntawd, hnub no Huab Tais Yes Xus xa peb mus kom ua tim khawv txog kev nyiam ua piv txwv rau luag tej pom tias peb tus Tswv Ntuj yog txoj kev nyiam tiag tiag. Peb thiaj li ua tim khawv txog txoj kev nyiam, peb tsis ua tim khawv txog txoj kev sib cav sib ceg, tsis sib haum xeeb.
Thov Peb tus Tswv Ntuj: Peb Leeg Huab Tais uas peb hwm txog hnub no, foom hmoov zoo rau peb txhua leej txhua tus mog.
