ZAJ NYEEM HNUB TIM 23 LUB 11 HLIS 2025
HNUB HWM YES XUS UA VAJ
COV LUS NYOB HAUV LUS KAS NTAWV MOO ZOO (LK 23: 35-43)
Kwv tij Hmoob sawv daws, hnub no yog hnub chiv hwm Yes Xus ua vaj. Lub Koom Txoos Kas Tos Liv caw peb sawv daws kom ras txog Huab Tais Yes Xus uas yog tseem vaj. Kev ua vaj ntawm Yes Xus tsis zoo li cov vaj uas peb paub txog. Nws tsis muaj cov tub rog, nws tsis muaj nyiaj txiag, tsis muaj chaws muaj vaj muaj tsev zoo nkauj nyob. Qhov nws muaj yog ntoo cuam. Nws raug luag dai saum ntoo cuam kom pab thiab cawm tib neeg kom dim ntawm kev txhaum, kev tsis zoo huv tib si. Qhov nws muaj yog txoj kev hlub tib neeg, cov neeg txhaum zoo li koj thiab kuv, zoo li peb sawv daws. Zoo li Lus Kas lub Moo Zoo hnub no pab peb kom pom tseeb tias nyob saum ntoo cuam, luag hiam thiab thuam Huab Tais Yes Xus zoo li cas. “Saib koj yog cov Yus Das tus vaj no, koj cia li cawm koj mas!”, “Koj tsis yog Leej Pleev lod? Koj rov cawm koj thiab cawm peb mas.” Luag thuam nws li no, tiam sis, Huab Tais Yes Xus ua siab ntev, nws tsis npau taws, nws tsis ntxub cov tib neeg ntawd, vim nws hlub lawv thaum lawv tseem yog neeg txhaum, thaum lawv tseem ua txhaum. Li no, yog tus vaj uas yog Yes Xus.
Tsis tas li ntawd, hnub no tseem yog hnub uas peb cov neeg ntseeg yuav xaus lub xyoo 2025 no. Hnub chiv yav tom ntej, peb yuav pib xyoo tshiab lawm. Peb yuav nkag hauv lub caij Tos Huab Tais lawm. Qhov no tseem yog ib lub cim tseem ceeb qhia peb tias lub neej nyob ntiaj teb no muaj hnub kawg. Ces hnub kawg ntawd yog hnub uas Huab Tais Yes Xus yuav rov qab los kav lub sim ceeb no. Nws yuav txiav txim tib neeg hauv txoj kev hlub. Leej twg ua neeg nyob hauv txoj kev nyiam kev hlub kuj tsim nyog nrog Tswv Ntuj nyob hauv nws lub xub ntiag. Peb nkag mus hauv lub xyoo tshiab uas peb npaj tos txais tus me nyuam Yes Xus yug los thiab peb xaus lub xyoo no hwm Yus Xus ua vaj. Txhais tau tias peb yug los hauv Yes Xus lub npe. Hnub kawg, thaum peb lub neej tas lawm ces peb kuj yuav nrog tus Vaj Yes Xus nyob thiab. Li ntawd, ib xyoo los txog ces dhau lawm kuj ua kom peb ras txog peb lub neej thiab peb txoj kev ntseeg. Saib tias peb puas ua lub neej hauv Huab Tais Yes Xus txoj kev hlub. Peb puas ua lub neej zoo li nws tus piv txwv uas txawm tias nws dai saum ntoo cuam, nws tseem hlub peb sawv daws. Txawm tias peb yog neeg txhaum, nws kuj hlub peb.
Nyob zoo sawv daws.
