Hnub Chiv, tim 22 lub 2 hlis 2026
Hnub Chiv, Lis Piam 1 caij Plaub Caug
Cov lus nyob hauv Mas Tais Ntawv Moo Zoo (MT 4: 1-11)
Cov kwv tij Hmoob sawv daws, hnub no yog thawj hnub chiv hauv lub caij Plaub Caug. Lub caij plaub caug yog lub sij hawm uas peb rov qab los saib ntawm yus lub neej, saib ntawm yus tus kheej, saib tias yus ua neej zoo li cas. Puas ua neej hauv txoj kev ncaj ncees los txoj kev zoo?
Hauv lub Moo Zoo hnub no, peb hnov tias Huab Tais Yes Xus raug dab phem ntxias, tiam sis, nws yeej kev ntxias. Lub Moo Zoo qhia peb tias yog peb tseem ua neej nyob hauv lub ntiaj teb no, peb yuav ib txwm raug dab phem ntxias. Yog peb tsis ua neej raws li Huab Tais Yes Xus txoj cai, peb yuav mus deb ntawm Tswv Ntuj zuj zus. Dab phem yuav ntxias peb kom ua neej yuam kev ntawm Tswv Ntuj.
Peb yam uas dab phem ntxias Huab Tais Yes Xus, nws kuj yuav ntxias peb thiab. Yam tim ib kev tshaib kev nqhis, tsis hais qhov noj qhov haus xwb tiam sis txhua yam uas ua rau peb tshaib thiab nqhis tsis txawj tag. Yam tim 2 yog kev muab hlob, kev thuam Tswv Ntuj, tsis mloog Tswv Ntuj Lo Lus, tsis ua neej hauv Tswv Ntuj txoj kev hlub; yam tim 3 yog kev ntshaw raws li lub ntiaj teb qhuas txog, suab npe los sis hwj chim ntawm ntiaj teb. Tsis ntshaw txog Ntuj lub Ceeb Tsheej.
Kwv tij sawv daws, hauv lub caij no, thov kom peb saib ntawm yus lub neej thiab twm txog qhov no. Saib tias peb tab tom ua neej raws li Huab Tais Yes Xus tus piv txwv los dab phem kev ntxias. Yog peb pom meej lawm, ces, lub caij no yog lub sij hawm zoo uas peb yuav tig los yuav lub siab tshiab thiab ntseeg txog Huab Tais Yes Xus, ntseeg txog Nws Lo Lus.
