Hnub Chiv Tim 19 lub 5 Hlis Ntuj 2024
Hnub nyoog Leej Ntuj Plig Nqes Los
Zam 20: 19-23
“Nej txais Leej Ntuj Plig Ntshiab.”
Nyob zoo…
Hnub chiv no yog hnub nyoog Leej Ntuj Plig nqes los. Lub caij Hla tas lawm. Peb pib lub caij tshiab, yog tias lub caij Nruab Xyoo.
Yes Xus hais tias “Nej nyob kaj lug,” ces nws tshuab pa rau saum cov thwj tim. Nws hais tias “Nej txais Leej Ntuj Plig Ntshiab.” Ua li ntawd, Yes Xus cov thwj tim tas huv tib si tau txais Leej Ntuj Plig Ntshiab hauv Yes Xus lub npe lawm. Hais txog Leej Ntuj Plig Ntshiab mas, Leej Ntshiab Paj Lug sau rau cov Kos Lis Nthos Tsab Ib hais tias “Ntuj pub ntau yam txiaj ntsim, tiam sis yog tuaj ntawm Leej Ntuj Plig tib leeg tuaj xwb.” Nws qhia ntxiv tias “Muaj ntau txoj kab xwm, tab sis yog tuaj ntawm tib tug Huab Tais tuaj. Muaj ntau txoj hauj lwm, tab sis yog tib tug Tswv Ntuj ua cov hauj lwm ntawd nyob hauv txhua leej tib neeg.” Leej Ntshiab Paj Lug qhia kom peb paub txog “kev sib txawv thiab kev sib koom siab.” Leej Ntuj Plig Ntshiab yog tus uas coj ntau tus tuaj ua ke; thiab lub Koom Txoos Kas Tos Liv tau yug los li no: peb txhua tus sib txawv, tab sis peb sib koom siab hauv Leej Ntuj Plig Ntshiab.
Hauv hnub nyoog Leej Ntuj Plig Nqes Los los hnub Pentecost, cia peb saib cov Hauv Paus Xa Lus; ib txhia yog cov neeg nuv ntses, lawv yog cov neeg tsis txawj ntaub txawj ntawv zoo li Pob Zeb, Yas Kos, As Nres thiab Zam; ib txhia yog cov neeg txawj ntse, tawj ntaub ntawv zoo li Mas Tais, zoo li Paj lug. Lawv tau los ntawm ntau haiv neeg thiab kev sib raug zoo, thiab lawv muaj npe Hebrew thiab Greek. Hais txog tus cwj pwm, ib txhia ua siab mos siab muag thiab ib txhia yog tawv taub hau tawv ncauj; lawv txhua tus nyias muaj nyias lub tswv yim thiab kev xav. Lawv txhua tus txawv. Huab Tais Yes Xus tsis hloov lawv; nws tsis ua kom lawv zoo sib xws. Tsis yog. Yes Xus tso lawv qhov kev sib txawv thiab tam sim no Yes Xus pleev lawv hauv Leej Ntuj Plig Ntshiab ua kom lawv sib koom siab ua kom lawv sib haum xeeb. yog vim kev pleev hauv Leej Ntuj Plig Ntshiab, cov thwj tim sib koom siab ua ib pab ib pawg. Txawm tias cov thwj tim nyias muaj nyias kev txawv ntau yam, tab sis mas, lawv kuj ua tau ib pab ib pawg lawv kuj muaj kev sib koom siab.
Kwv tij hmoob sawv daws, ib yam li Leej Ntshiab Paj Lug hais “Muaj ntau txoj kab xwm, tab sis yog tuaj ntawm tib tug Huab Tais tuaj. Muaj ntau txoj hauj lwm, tab sis yog tib tug Tswv Ntuj ua cov hauj lwm ntawd nyob hauv txhua leej tib neeg.” Ua li ntawd mas, thov kom peb lees txais tias peb sawv daws muaj kev sib txawv, Tswv Ntuj pub txawv lub txiaj ntsim rau peb kom ua Tswv Ntuj txoj hauj lwm, kom peb sib koom siab cav txog Tswv Ntuj ua ke.
Peb ntseeg tias tom qab Huab Tais Yes Xus mus saum Ntuj lawm, Leej Ntuj Plig Ntshiab yog tus coj lub Koom Txoos ntxiv mus. Leej Ntuj Plig tshoj lub Koom Txoos lub siab,tus vaj qhia, cov tswv qhia, cov txiv plig thiab tshoj peb sawv daws lub siab kom qhib lub siab rau qhov tsis thoob los qhov uas peb tsis paub ua ntej, kom peb qhib siab txais qhov tshiab uas Tswv Ntuj yuav npaj rau peb.
Hnub Pentecost los hnub kwm Leej Ntuj Plig Ntshiab nqes los yog hnub uas lub Koom Txoos tau yug los thiab peb tau txais txoj kev ntseeg, peb tau hnov lub Moo Zoo. Thov kom peb niaj hnub qhib peb lub siab lub tswv yim mloog Leej Ntuj Plig lub suab hais rau peb thiab tshoj peb lub siab thiab mog.
