Zaj nyeem hnub tim 17 lub 5 hlis 2026
Hnub hwm Yes Xus nce mus saum ntuj
Cov lus nyob hauv Mas Tais Ntawv Moo Zoo (MT 28: 16-20)
Cov kwv tij Hmoob, hnub chiv no yog hnub hwm Yes Xus nce mus saum ntuj. Cov lus nyob hauv Mas Tais Ntawv Moo Zoo hnub no, Huab Tais Yes Xus xa cov thwj tim kom mus ua hauj lwm tshaj Ntuj Lus thoob ntiaj teb. Txoj hauj lwm tshaj Ntuj lus no yog Yes Xus cov thwj tim txoj hauj lwm. Leej twg kuj xij hu nws tus kheej tias Yes Xus cov thwj tim, nws yuav tsum ua txoj hauj lwm no; leej twg kuj xij tau txais lub cim ntxuav ua Yes Xus thwj tim lawm, ces nws yuav tsum ua tim khawv txog lub Moo Zoo los sis kom lawv paub txog Leej Txiv, Leej Tub uas yog Huab Tais Yes Xus, thiab Leej Ntuj Plig Ntshiab.
Muaj ib yam tseem ceeb uas kuv xav kom peb sawv daws ras txog me ntsim. Mas Tais qhia tias thaum cov thwj tim pom Yes Xus, lawv pe. Tiam sim, muaj ib txhia tseem ua xyem xyav; tsis tau ntseeg tiag tiag. Kwv tij sawv daws, nej sim xav, txawm tias nyob lub caij ntawd cov thwj tim tau pom Yes Xus, ib txhia tseem tsis tau ntseeg; lawv tseem ua xyem xyav. Zaj no qhia peb tias tej zaum tsis yog tias peb tau pom Yes Xus peb thiaj ntseeg, los peb pom hwj huam yees ntxwv peb thiaj ntseeg. Qhov tseem ceeb yog txawm tias peb tsis pom Yes Xus, peb lub siab puas ntseeg txog nws? Peb puas tso siab rau Tswv Ntuj? Peb puas ntseeg tiag tiag tias Huab Tais Yes Xus niaj hnub nrog nws cov thwj tim nyob mus txog lub zim txwv ntiaj teb kawg. Zoo yam li hnub no nws cog lus tias nws tsis mus qhov twg deb, tiam sis nws niaj hnub nrog cov thwj tim nyob mus txog lub zim txwv ntiaj teb kawg.
Ntawm peb mas, peb puas ntseeg lub Moo Zoo uas peb mloog? Yog peb ntseeg, peb yuav tsum muab siab ua hauj lwm tshaj Ntuj Lus hauv peb lub neej. Ua hauj lwm tshaj txog kev nyam kev hlub, kev zam txim. Ua li no, ces peb thiaj yog Yes Xus thwj tim tiag tiag.
Nyob zoo sawv daws.
