Hnub chiv tim 17 lub 11 hli ntuj 2024
Mas Kos. 13:24-32
Lub lis piam 33th
Lub Caij Nyob Nruab Xyoo
“Lub ntuj lub teb yuav ploj, tab sis kuv cov lus yuav tsis ploj.”
Cov kwv tij hmoob sawv daws, hnub no yog hnub chiv hauv lub lub lis piam tim 33 hauv lub caij nyob nruab xyoo. Ntawm lub Koom Txoos Kas Tos Liv mas, muaj 34 lub lis piam hauv Lub caij nyob Nruab Xyoo xwb. Tshuav 1 lub lis piam los yog lub lis piam yav tom ntej xwb, peb yuav pib Lub Koom Txoos Kas Tos Liv daim ntawv qhia hnub xyoo tshiab lawm. Peb yuav hla mus hauv lub Caij Tos Huab Tais Yes Xus lawm. Li ntawd, mas lub sij hawm no, peb yuav mloog Tswv Ntuj lub Moo Zoo qhia txog hnub kawg los yog hnub Huab Tais Yes Xus yuav rov qab los zaum 2.
Cov kwv tij, nej hnov Huab Tais Yes Xus hais tias “thaum kev txom nyem nyuam qhuav dua tas, muaj ib ntus, lub hnub yuav tsaus nti, lub hli yuav tsis xa qhov ci tuaj, cov hnub qub yuav poob saum ntuj los…” nej xav li cas? Nej puas ntshai? Kuv xav tias cov leej thaum hnov li no kuj ntshai kawg puas yog? Peb yuav ua neej nyob tau li cas? Peb yuav muaj txoj sia nyob ntev npaum li cas?
Muaj 2 txoj kev xav hauv hnub no. nqe tim ib yog tias peb cov neeg ntseeg Kas Tos Liv ntseeg txog hnub kawg los yog hnub uas Huab Tais Yes Xus yuav rov qab los kav lub sim ceeb, tej zaum peb hu tias “hnub txiav txim.” Nyob hauv zaj “Kuv Ntseeg txog Tswv Ntuj” peb tshaj txhua hnub chiv, peb yeej hais tias “Nws nce mus lawm saum ntuj, zaum ntawm Leej Txiv phab xis. Nws yuav rov los txiav txim rau ib zeej tsoom neeg ciaj neeg tuag.” Li ntawd, Neeg Leej Tub los yog Huab Tais Yes Xus yuav rov qab los tiag tiag, peb ntseeg li ntawd nawb. Tab sis mas, peb tsis paub, hnub tawg nws yuav rov los. Tsis muaj leej twg paub li, tsis hais Leej Tub los cov tshiab nyob saum ntuj kuj tsis muaj leej twg paub, tsuas muaj Leej Txiv Tib Leeg xwb thiaj paub xwb.
Txoj kev xav nqe 2 mas yog qhia tias thaum hais txog hnub kawg los hnub txiav txim, peb yuav tsum txhob ntshai los txhob txhawj siab los nyuaj siab txog hnub ntawd. Huab Tais Yes Xus Cov Lus Qhia no tsis yog ua kom peb ntshai, tab sis mas, Huab Tais Yes Xus xav kom peb ceev faj, kom ib txwm npaj yus lub siab kom txhij, npaj yus tus kheej kom txhij, npaj yus lub neej kom ncaj ncees. Tsis tas li ntawd, tseem qhia tias lub sij hawm no yog lub sij hawm caw peb kom tos Huab Tais Yes Xus. Peb muaj kev vam thiab kev cia siab tos Huab Tais Yes Xus rov qab los. Li ntawd, peb thiaj li npaj yus tus kheej kom txhij, ua neej nyob kom muaj qab hau, taug kev hauv kev ncaj ncees thiab nco ntsoov tias muaj Tswv Ntuj nrog nraim yus. Kwv tij zoo nyiam sawv daws, peb tib neeg tsis nyob ntev, peb ib leeg ib leeg tsis muaj sia nyob ntev thiab peb tsis paub thaum twg Tswv Ntuj yuav coj peb mus, los Tswv Ntuj yuav coj tus peb hlub mus. Li ntawd, peb yuav tsum ua neej nyob hauv txoj kev sis nyiam sis hlub, txhob ua neej nyob hauv kev sib ntxub sib cav sib ceg. Tsis ntev, peb sawv daws kuj tsis nyob lawm, peb li vaj tsev, koj tsis yog peb li, yuav yog lwm tus li, peb li nyiaj txiag peb khaws cia kuj tsis yog peb li, yuav yog lwm tus li. Li ntawd, npaj yus lub neej kom txhij, ua neej nyob kom zoo, tso siab rau Tswv Ntuj, mloog Tswv Ntuj Lo Lus txhua hnub, yuav ua kom peb muaj dag muaj zog.
Thov Tswv Ntuj foom hmoov zoo rau peb txhua leej txhua tus. Nyob zoo.
