Hnub chiv tim 15 lub 9 hli ntuj 2024
Mas Kos 8:27-35
Lub lis piam 24th
Lub Caij Nyob Nruab Xyoo
“Yog Leej twg xav los raws kuv, nws yuav tsum nrauj nws, nws yuav kwv nws tus ntoo cuam, nws yuav lawv kuv qab.
Kwv tij Hmoob sawv daws, Hnub no Huab Tais Yes Xus cov lus qhia nyuaj kawg, Nws Lo Lus qhia ua rau peb nyuab siab thiab ntxhov siab kawg. Yes Xus hais tias “Yog leej twg xav los raws kuv, nws yuav tsum nrauj nws, nws yuav kwv nws tus ntoo cuam, nws yuav lawv kuv qab.” Leej twg xav raws Yes Xus qab, nws yuav tsum nrauj nws tus kheej rau Yes Xus, muab nws tus kheej tag nrho rau Yes Xus. Yes Xus tsis hais tias “Leej twg xav los raws kuv, nws yuav muaj nyiaj muaj txiag, nws yuav muaj suab muaj npe koob meej, sawv daws yuav qhuas txog.” Tsis yog! Nws tsis hais li ntawd. Ntawm qhov tsis sib xws mas, Huab Tais Yes Xus thov kom peb mus tawm ntawm peb kev nplij siab los qhov chaws yus xis nyob los mus tawm ntawm peb comfort zone.
Hauv Ntawv Moo Zoo peb hnov tias Pob Zeb lees tias Huab Tais Yes Xus yog Leej Pleev. Tab sis mas, tom qab ntawd, tsis ntev, thaum Pob Zeb hnov Yes Xus hais txog nws txog kev txom nyem, txoj kev tuag, thiab kev sawv rov los, Pob Zeb txais tsis tau cov lus ntawd. Pob Zeb rub Yes Xus los ntawm nws, ces Pob Zeb nroo rau Yes Xus. Tos Pob Zeb ua li no kuj vim rau qhov hais tias Pob Zeb tsis to tau Yes Xus cov lus qhia tiag tiag. Pob Zeb zoo siab tos txais kev muaj suab muaj npe, sawv daws yuav qhuas txog, yog muaj ib hnub mas lawv tsa Yes Xus ua vaj. Pob Zeb tsis xav txais kev txom nyem thiab kev tuag uas Huab Tais Yes Xus hais txog. Huab Tais Yes Xus lo lus qhia tsis xws li Pob Zeb xav. Yes Xus hais rau cov thwj tim kom lawv lawv nrauj lawv tus kheej. Yes Xus qhia ntxiv tias “Leej twg xav cawm nws txoj sia, mas nws yuav plam nws txoj sia. Hos leej twg plam nws txoj sia vim kuv thiav vim lub Moo Zoo, mas nws cawm nws txoj sia.”
Kwv tij sawv daws, kev txom nyem thiab teeb meem ntau yam hauv yus lub neej mas tsis yog txim, tsis yog qhov ua rau peb tu siab, ua rau peb tsis xav muaj txoj sia nyob. Tsis yog! Kev txom nyem thiab teeb yogi b feem ntawm peb lub neej. Tsis muaj leej twg hauv lub ntiaj teb no tsis muaj kev txom nyem thiab teeb meem. Tsis hais cov plug los cov npua nug, tsis hais cov zoo los cov phem, tsis hais cov hluas los cov laus, tsis hais cov ntseeg txog Yes Xus los tsis ntseeg. Sawv daws raug kev txom nyem raug teeb meem ib yam li thiab.
Ntawm peb cov neeg ntseeg mas, yog peb ntseeg Ntuj tiag tiag, ntseeg Ntuj tsis ruaj nreb, peb yuav pom tias kev txom nyem los teeb meem yog ib feem hauv peb lub neej uas ua kom peb loj hlob tuaj, ua kom peb txawj sib nyiam sib hlub, ua kom peb nyiam Tswv Ntuj tshaj dua, ua rau peb loj hlob hauv txoj kev ntseeg. Tej zaum mas, peb kuj yog zoo li Pob Zeb peb hnov hnub no. Peb tsis xav txais kev txom nyem los teeb meem dab tsi, qhov peb xav tau yog kev muaj suab muaj npe nto moo, muaj nyiaj muaj txiag ntau, tej zaum ua rau peb nroo Tswv Ntuj, tsis kam txais kev txom nyem hauv yus lub neej. Li ntawd, thov kom Tswv Ntuj Lo Lus hnub no peb muab khaws cia hauv peb lub siab tias: “Yog Leej twg xav los raws kuv, nws yuav tsum nrauj nws, nws yuav kwv nws tus ntoo cuam, nws yuav lawv kuv qab.” “Leej twg xav cawm nws txoj sia, mas nws yuav plam nws txoj sia. Hos leej twg plam nws txoj sia vim kuv thiav vim lub Moo Zoo, mas nws cawm nws txoj sia.”
