Hnub Chiv, tim 15 lub 2 hlis 2026
Hnub Chiv, Lis Piam 6 caij Nyob Nruab Xyoo
Cov lus nyob hauv Mas Tais Ntawv Moo Zoo (MT 5: 17-37)
MT. 5:20-22, 27-28, 33-34, 37
Cov kwv tij hmoob sawv daws, Huab Tais Yes Xus cov lus qhia hnub no caw peb kom twm txog kev txhaum, kev tsis zoo, los kev npam. Hais txog kev txhaum no mas, Huab Tais Yes Xus tsis hais txog 10 lo lus qhia yam li “koj tsis txhob tua neeg,” los “Koj tsis txhob deev luag txij luag nkawm,” xwb, tab sis, nws hais txog qhov uas nyob hauv peb lub siab. Huab Tais Yes Xus hais txog kev nqhis kev ntshaw hauv peb lub siab uas tsis txawj tsaus, tsis txawj ploj. Kev phem kev txhaum tsis yog kev hla lo lus qhia los tej qhov caiv tsis pub ua zoo li cov Kwv Ntawv Ntshiab thiab cov Fas Lis Xais xav xwb. Tiam sis, tob dua ntawd yog qhov phem qhov txhaum uas nyob hauv peb lub siab, nyob hauv peb lub tswv yim. Vim li no, hauv zaj kuv lees txhaum, peb thiaj lees tias peb tu siab rau qhov uas peb lub siab xav txhaum, peb lub ncauj hais txhaum, thiab peb lub cev ua txhaum. Li ntawd, Huab Tais Yes Xus qhia kom peb ceev faj ntawm qhov nyob hauv peb lub siab uas yuav coj peb mus ua qhov txhaum, qhov tsis zoo rau luag lwm tus.
Li ntawd, cov kwv tij sawv daws, thov kom peb coj Tswv Ntuj Lo Lus hnub no mus xav, mus twm txog kom zoo mog. Thov kom Huab Tais Yes Xus pab peb kom to taub Nws cov lus qhia, to taub lub ntsiab lus ntawm Nws cov lus qhia tiag tiag thiab coj mus ua kom tshwm sim tseeb hauv peb lub neej, kom peb loj hlob hauv peb txoj kev ntseeg zuj zus.
Nyob zoo sawv daws.
