Hnub chiv tim 14 lub 7 hli ntuj 2024
Mas Kos. 6:7-13
Lub Caij Nyob Nruab Xyoo
Nyob zoo…
Kwv tij zoo nyiam sawv daws, hnub no yog hnub chiv lub lis piam 15 hauv lub caij nyob Nruab Xyoo, lub Koom Txoos caw peb kom saib ntawm yus tus kheej hais tias “kev ua Yes Xus thwj tim” loj hlob zoo li cas lawm. Hauv Mas Kos Ntawv Moo Zoo hnub no peb pom tias Yes Xus hu Pab Kaum Ob los cuag nws, ces nws xa lawv ua tej pab ob leeg mus. Qhov no yog qhov pib ua Yes Xus cov thwj tim. Yes Xus “hu” lawv, ces nws “xa” lawv mus ua tim khawv txog Yes Xus uas yog Tswv Ntuj Leej Tub. Qhov uas kuv xav caw peb sawv daws xav tswv yim txog yog ob lo lus no: “hu” thiab “xa.”
Peb paub tias Tswv Ntuj hu peb ib leeg ib leeg los ua nws me tub me nyuam. Tswv Ntuj hu peb los ntseeg txog nws. Tsis tas li ntawd, peb txiav txim siab los ntseeg Tswv Ntuj, los txais lub Cim Ntxuav, kuj vim rau qhov hais tias peb nyiam Tswv Ntuj, peb xav kom Tswv Ntuj cawm peb kom dim ntawm kev txhaum, kev phem, kev tsis zoo. Peb xav ua neeg zoo raws li Tswv Ntuj lub siab nyiam, peb xav ua neej kom muaj qab hau muaj txiaj ntsim rau luag tej. Cov Hauv Paus Xa Lus lawv kuj xav li no thiab. Lawv nrauj yus tus kheej rau Tswv Ntuj, vim lawv xav ua neej raws li Yes Xus, tsob hwb lwm tus kom lawv tau ntsib Tswv Ntuj kev nyiam kev hlub hauv lawv lub neej. Lawv yog tus coj Tswv Ntuj txoj kev nyiam rau luag tej kom paub, ces lawv kuj yuav ua zoo li ntawd thiab, yog tias coj Tswv Ntuj txoj kev nyiam rau lwm tus ntxiv mus.
Kwv tij sawv daws, peb paub tias Tswv Ntuj hu peb kom ntseeg txog nws lawm, tab sis mas, tsis tas li ntawd xwb, ntxiv mus mas Tswv Ntuj yuav “xa” peb mus zoo li nws xa Pab Kaum Ob mus. Lawv tau ntsib Yes Xus lawm, lawv tau pom tej yam hwj huam yees ntxwv Yes Xus ua, lawv tau kawm Yes Xus cov lus qhia, lawv tau ntsib Tswv Ntuj lawm, lawv yuav nyob twj ywm tsis tau, lawv yuav tsum mus ua tim khawv txog qhov lawv tau pom rau lwm tus paub. li ntawd mas, Yes Xus thiaj xa lawv mus kom ua tim khawv txog Yes Xus. Yes Xus kuj ua zoo li no rau peb cov ntseeg sawv daws thiab. Yes Xus xa peb mus ua thim khawv txog nws. Ua li ntawd mas, peb yuav ua tim khawv zoo li cas?
Zoo li nws ua rau Pab Kaum Ob, Yes Xus pub hwj huam rau peb kom lawv ntiab dab tsis huv, kom peb txhawb nqa lub zog rau cov ntxhov siab nyuaj siab, kom peb teev Ntuj rau cov muaj teeb meem, cov tsis nyiam Ntuj los tsis nyiam peb, kom peb mus xyuas cov neeg mob, kom peb foom lus zoo rau lwm tus, kom peb siab zoo rau luag tej, tsis cem tsis ntxub lawv. Qhov no yog txoj kev ua tim khawv txog Yes Xus, thiab qhov no yog kev ua Yes Xus thwj tim.
Kwv tij zoo nyiam sawv daws, nej puas yog Yes Xus thwj tim tiag tiag? Nej teb yus tus kheej xwb mas. Kuv xav tias lub Moo Zoo hauv hnub no phim peb kawg uas peb yuav siv sij hawm ras txog yus tus kheej thiab Tswv Ntuj. Ntawm peb mas, hnub no peb ua tim khawv txog Yes Xus zoo li cas?
