Hnub chiv tim 1 lub 9 hli ntuj 2024
Kos. 7:1-8, 14-15, 21-23
Lub lis piam 22nd
Lub Caij Nyob Nruab Xyoo
“tsis muaj dab tsi nyob sab nraum neeg lub cev, uas nkag rau hauv neeg yuav ua kom neeg tsis huv. Yam ua kom neeg tsis huv yog yam tawm hauv neeg los.
Kwv tij hmoob sawv daws, lub Moo Zoo hnub no peb hnov Huab Tais Yes Xus hais txog qhov huv thiab qhov tsis huv. Cov Fas Lis Xais thiab tus puav Kws Ntawv Ntshiab pom tus puav thwj tim xuas tes tsis huv noj mov ua rau cov Fas Lis Xais tsis txaus siab vim lawv xav kom sawv daws ua raws li lawv tej kab ke. Lawv xav kom luag tej ua raws li lawv ua, lawv xav kom luag tej ua raws li lawv tej kab ke thiaj yog qhov huv, thiaj yog qhov zoo, thiaj yog qhov raug. Vim li no mas, Huab Tais Yes Xus thiaj hais tias “tsis muaj dab tsi nyob sab nraum neeg lub cev, uas nkag rau hauv neeg yuav ua kom neeg tsis huv. Yam ua kom neeg tsis huv yog yam tawm hauv neeg los.” Qhov no yog qhov tiag kwv tij sawv daws. Tej zaus mas peb nyiam siv txoj cai los tej kab ke los ua qhov txiav txim tias qhov zoo, qhov no tsis zoo, qhov no huv, qhov no tsis huv, qhov no yog, qhov no tsis yog! Ntau zaus tib neeg siv yus tus kheej txiav txim luag tej. Yus xav li cas, luag tej yuav tsum xav li ntawd. Yus mloog yus xwb, yus tsis xav mloog luag tej li kev xav. Ntau zaus peb nyiam saib tej yam sab nraum yog qhov loj, yog qhov uas peb coj los txiav txim lwm tus. Qhov tiag mas, peb tsis paub zoo tias tiag tiag mas tus ntawd yog neeg zoo li cas. Ib yam li Huab Tais Yes Xus hais, tej yam phem tiag tiag mas tsis yog qhov tias yus tsis ua raws li tej kab ke los tej kev cai, tab sis mas, yog qhov uas txhawv hauv neeg nruab siab los. Yus ua neeg nyob mas, yus ua lub neej zoo li cas. Yus puas ua neeg zoo, yus puas ua neej nyob hauv txoj kev ncaj ncees? Yus puas ua tub sab los tua neeg, yus puas ua dev ua npua los deev luag txij luag ntawm, yus puas ua cuav los khib luag tej, yus puas muab hlob los ywj fab ywj fwj? Yes Xus hais tias “txhua hom kev phem no tawm sab hauv los, mas thiaj ua kom neeg tsis huv.”
Kwv tij sawv daws, hnub no, Huab Tais Yes Xus caw peb kom saib ntawm yus kheej ua ntej yus saib ntawm luag tej lub neej tias yus ua lub neej zoo li cas? Yog peb pom tias peb tseem muaj tej yam phem xws li Huab Tais Yes Xus hais, mas peb kuj siv lub sij hawm no hloov yus lub neej tshiab, tsis rov qab los ua qhov phem li hais. Yuav yus lub siab tshiab los taug hauv Tswv Ntuj txoj kev ncaj ncees. Siv Tswv Ntuj cov lus qhia los coj peb lub neej. Cia kom Tswv Ntuj Lo Lus kaj peb txoj kev, mas peb tsis poob txoj kev.
Thov kom Tswv Ntuj Lo Lus hnub no pab peb kom ua neej hauv txoj kev nyiam kev hlub thiab hauv txoj kev zoo. Thov Tswv NTuj foom koob foom hmoov nej sawv daws txhua leej txhua tus mog.
