Hnub Chiv tim 1 lub 6 Hlis 2025
Lub lis piam 7 caij hla Huab Tais Yes Xus rov mus lawm saum Ntuj
Lus Kas: 24:46-53
“Yes Xus tsa tes foom hmoov zoo rau lawv.”
Nyob zoo…
Hnub chiv no yog hnub nyoog Huab Tais Yes Xus rov mus lawm saum ntuj. Caij hla yuav xaus lub lis piam no. peb tau ntsib tau pom Huab Tais Yes Xus tus Sawv Rov Los lawm, Huab Tais Yes Xus zog peb lub siab thiab nplij peb lub tswv yim kom muaj kev vam thiab kev cia siab rau Yes Xus lawm, ntxiv mus mas nws yuav xa nws cov thwj tim, nws yuav xa peb sawv daws kom mus ua txoj hauj lwm tseem ceeb yog hais tias “txoj hauj lwm tshaj lub Moo Zoo” rau luag tej paub, tshaj lub Moo Zoo rau peb cov kwv tij hmoob tau paub tau hnov tias Tswv Ntuj nyiam lawv npaum li cas.
Hauv Ntawv Moo Zoo, Lus Kas qhia tias ua ntej Tswv Ntuj yuav nqa Yes Xus mus saum ntuj, Huab Tais Yes Xus tsa tes foom hmoov zoo rau cov thwj tim. Hos cov thwj tim, mas lawv txhos caug pe Yes Xus. Lawv rov qab mus Yes Lus Xa Les, lawv zoo siab tas nrho. Thaum lub caij uas Huab Tais Yes Xus qhia tas ib puas tsav yam rau lawv tiav lawm, nws tso lawv pov tseg, mas lawv yuav tsum mus kev ua txoj hauj lwm tshaj Ntuj Lus. Yes Xus cov thwj tim yuav tsum 1) tshaj txoj kev tig los hloov siab ntxub kev txhaum thiab 2) tshaj txoj kev zam txhaum nyob hauv Yes Xus lub npe. Tas ib tsoom haiv neeg thiaj yuav paub tias Tswv Ntuj nyiam lawv npaum li cas. Yes Xus cov thwj tim txhua leej txhua tus yuav tsum ua hauj lwm no thiab.
Txawm tias niaj hnub no Huab Tais Yes Xus tsis nrog peb nyob zoo li ib tug neeg lawm, tsis kav peb paub tias nws nrog nraim peb, nws nyob ze peb hauv thaj txi Ntuj, hauv lub Cim Yug, thiab hauv Ntuj Lo Lus. Qhov tseem ceeb tshaj plaws yog tias peb ua neeg ua piv txwv zoo rau luag. Peb lub neej ua kom sawv daws pom tias muaj Tswv Ntuj tiag. Yog Tsw Ntuj Lo Lus peb hnov txhua niaj hnub pom tseeb hauv peb lub neej, tshwm sim tuaj tiag hauv peb lub neej, peb kuj tab tom ua tim khawv txog Huab Tais Yes Xus tus sawv rov los. Kuj txhais tau tias Huab Tais Yes Xus tseem nrog nraim peb, Huab Tais Yes Xus tseem nyob ze peb. Peb cov ntseeg sawv daws yuav tsum ua li no. Peb tus Tswv Ntuj yog Tswv Ntuj muaj txoj sia, li ntawd, Huab Tais Yes Xus tseem muaj txoj sia nyob hauv peb cov neeg ntseeg, nyob hauv lub Koom Txoos Kas Tos Liv mus tas ib txhiab ib txhis. Nco ntsoov tias ua ntej Huab Tais Yes Xus mus, nws tsa tes foom hmoov zoo rau cov thwj tim, lo lus foom hmoov zoo ntawd tseem nyob mus tas ib txhiab ib txhis hauv cov thwj tim, hauv lub Koom Txoos Kas Tos Liv, hauv Pob Zeb, hauv tus vaj qhia thiab cov tswv qhia. Niaj hnub no peb tseem tau txais txoj hmoov zoo ntawd.
Kwv tij sawv daws, ua ntej Huab Tais Yes Xus mus saum Ntuj, nws hais kom peb ua txoj hauj lwm tshaj lub Moo Zoo. Qhov no yog txoj hauj lwm ntawm cov neeg ntseeg sawv daws. Thaum peb txais lub cim Ntxuav, Huab Tais Yes Xus kuj muab txoj hauj lwm no rau peb ua lawm. Ntxiv mus mas peb yuav tsum ua tim khawv txog lub Moo Zoo. Peb yuav tsum ua neej ua piv txwv ntawm txoj kev sis nyiam sis hlub rau lwm tus, ua rau lawv paub Tswv Ntuj thaum lawv pom txoj kev hlub ntawm peb lub neej, tsis yog ntawm peb qhov ncauj xwb. Txawm tias Huab Tais Yes Xus mus lawm saum ntuj, tab sis mas nws tsis tso peb pov tseg. Nws tseem nyob nrog nraim peb sawv daws txhua leej txhua tus. Peb yuav tsum ua siab loj tshaj Tswv Ntuj lo lus, ua tim khawv txog Tswv Ntuj tas siab tas tsws mog
Thov kom Huab Tais Tswv Ntuj nrog nej nyob, kom nej sawv daws nyob kaj lug
