Fim koj txoj kev ntshai (We have to face our fear).
Ntawv Moo Zoo tam sim no, yog hais txog kev sib ntsib ntawm Yes Xus thiab Nis Kos Des Mos. Yog ib lo lus loj kawg nyob hauv Ntawv Ntshiab. Nws yog lo lus no :
“Vim Tswv Ntuj nyiam lub qab ntuj neeg npaum no, nws thiaj muab nws Leej Tub Twm Zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li.”
Yog muaj neeg nug koj tias : “Kev ntseeg Tswv Ntuj yog hais txog dab tsi ?”
Koj yuav muaj ib lo lus teb nyob hauv Ntawv Cog Lus Tshiab, yog lo lus peb nyuam qhuav hais : “Vim Tswv Ntuj nyiam lub qab ntuj neeg npaum no, nws thiaj muab nws Leej Tub Twm Zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li.”
Kuv xav mus qhov chaw ntawd, tab sis kuv xav muab siab rau txog qhov tseeb ua ntej yuav tshwm sim. Vim kuv xav tias : muaj ntau txoj hau kev uas peb tuaj yeem xaiv tau cov lus tawm los, tab sis peb tsis tau nws qhov tseem ceeb tiag tiag, vim peb tsis tau muab siab rau txog yam uas tshwm sim. Ua ntej no yog Nis Kos Des Mos lo lus hais uas loj kawg. Tus txwj laus ntawm cov His Xas Lais, cov His Xas Lais tus xib hwb tus tuaj ntsib Yes Xus yav hmo ntuj, kom tsis txhob muaj neeg pom nws.
Lawv poob siab tias ua cas tus xib hwb Las Npis no yuav txawj ua hwj huam yees ntxwv thiab txawj ntuas ua luaj, thiab lawv kuj muaj cov lus nug no. Vim li ntawd, kev sib tham thiaj tseem ceeb rau kev ntseeg thiab fab ntsuj plig nyob hauv cov neeg ntseeg. Tab sis qhov no yog qhov uas ntawv Moo Zoo nthuav tawm thiab yog lo lus ua ntej nyob hauv Zam ntawv Moo Zoo zaj 3 qib 16.
Yes Xus hais rau Nis Kos Des Mos tias : “Mais Xes tsa tus nab tooj nyob teb chaws suab puam zoo li cas, mas Tswv Ntuj Leej Tub kuj yuav raug tsa li ntawd. Tus ntseeg thiab tso siab rau tus nab tooj, nws yuav muaj txoj sia nyob mus li.”
Kev hais txog qhov ntawd, tsis muaj ib tug neeg twg hauv tiam neeg ib yuav tsis hais txog, yog tias lawv paub Ntawv Ntshiab Hes Nplaws. Kev hais txog yog ib ntu nyob hauv Ntawv Cog Lus Qub. Cov His Xas Lais tab tom tawm ntawm kev ua qhev mus rau thaj chaw Tswv Ntuj cog lus yuav muab rau lawv. Kev raug nab tom, yog hais txog tus nab nplaim taws. Yog ib tug nab muaj taug thiab tom neeg tuag coob, ces tsoom pej xeem thiaj tuaj ntsib Mais Xes, lawv hais rau Mais Xes tias : “Peb yuav ua li cas thiaj zoo ?” Mais Xes thiaj mus cuag Tswv Ntuj thiab Tswv Ntuj hais tias : “Saib seb ! Kuv xav kom koj puab ib tug nab. Xav kom koj muab tus nab txawb rau saum tus ncej. Kuv xav kom koj tuav khov kho, txhua tus neeg uas saib tus nab no nws yuav zoo.”
Ces txhua yam ntawd tshwm sim, thiab koj yuav xav tias yog ib zaj txawv heev.
Tsoom pej xeem uas raug nab tom lawv zoo tas. Vim li cas lawv thiaj hwm tus nab uas tom lawv, vim li cas ho kho tau lawv zoo ? Qhov no yog ib qho txawv kawg nyob hauv ib zaj lus muaj lub ntsiab tob. Nws yog qhov qhia peb tias : tus twg nyiaj mob nyob hauv txoj kev ntshai, mas nws yog zoo li raug nab tom. Muaj qee yam uas lawv tau ntsib nyob hauv lub neej ua kom lawv ntshai, nws tsim txom lawv, lawv yuav thov Tswv Ntuj tias : “Thov pab kom kuv dim ntawm txoj kev ntshai no.” Ces Tswv Ntuj yuav hais li cas ? Tswv Ntuj puas hais tias ; txhob khiav ntawm yam ua kom koj ntshai, koj tsa muag saib nws ces koj yuav zoo. Koj saib nws, ces koj txoj kev ntshai yuav ploj mus.
Koj puas paub tias : nyob hauv kev ntseeg, koj ntshai tham nyob ntawm ib zeej tsoom neeg xub ntiag, koj txaj muag. Koj yuav tsis txhob ua li ntawd, koj yuav tab meeg tham rau sawv daws, tab meeg fim los ntsib yam uas koj ntshai. Koj ntshai tawm mus ntsib sawv daws, ces koj nkaum nyob hauv tsev nrog koj txoj kev ntshai. Qhib koj lub siab thiab tawm mus ntsib koj txoj kev ntshai, vim koj ntshai txog kev piam sij. Tab sis koj tuaj yeem siv koj lub peev xwm tawm hauv tsev mus sab nraud thiab rov sim dua, zoo ib yam li koj poob nees ces koj rov sawv.
Koj yuav ua tib zoo xav tias dab tsi tom koj ? Dab tsi ua rau koj raug mob ?
Qhov no nws tseem ceeb heev, yog qhov Yes Xus ua rau Nis Kos Des Mos pom. “Vim Tswv Ntuj nyiam lub qab ntuj neeg npaum no, nws thiaj muab nws Leej Tub Twm Zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li.”
Thaum koj pom Yes Xus dai saum ntoo cuam koj yuav ntshai. Koj yuav xav tias ntiaj teb tsis muaj kev ncaj ncees thiab tib neeg lim hiam. Yog koj ib tug phooj ywg raug zoo li ntawd, mas koj yuav ntshai lees nws. Koj yuav hais tias kuv tsis paub nws. Yog koj tus phooj ywg ntxeev siab rau koj, nws tig los ua phem rau koj, koj yuav xav li cas ?
Tas txhua yam no ua kom koj pom meej nyob ntawm Yes Xus tus ntoo cuam, nws yog kev tsim txom thiab yog qhov phem tshaj plaws.
Peb yuav xav txog kev txom nyem uas raug tsim txom nyob saum ntoo cuam, nws yog kev tsim txom txaus ntshai heev, yog kev tsim txom lub cev. Peb sawv daws puav leej ntshai tsam peb lub cev raug mob thiab raug tsim txom. Raug ntsia saum ntoo cuam, vim yog txoj kev tsim txom mob tshaj plaws thiab phem kawg. Cov Los Mas txoj kev muab lub txim tua neeg yog zoo li ntawd.
Yes Xus nyob hauv kev raug tsim txom lub cev, kev mob hauv lub siab yog zoo li cas ? Nws raug tso pov tseg, nws tu siab thaum cov neeg khiav tas. Ib yam li cov neeg siv Social Media, kev sib liam tej yam cuav thiab qhov cuav ntawd nrov heev zuj zus, ces yog kev txaj muag loj kawg. Yes Xus kuj zoo li ntawd, thaum nws raug luag ntsia nyob saum ntoo cuam. Lub caij ntawd Yes Xus tsis hnav dab tsi, thiab tseem muaj ib daim txiag ntoo sau ib co lus thuam dai nyob saum nws taub tau. Cov neeg dhau kev mus los lawv nto qaub ncaug rau nws. Yog qhov txaj muag kawg nyob ntawm ib zeej tsoom xub ntiag, thiab qhov kawg yog qhov phem tshaj plaws. Thaum Yes Xus dai saum ntoo cuam nws hais tias : “Tswv Ntuj, ua cas koj tso kuv pov tseg ?”
Yog ib lo lus hais ntawm kev mob siab tob tob thiab kev raug tso tseg.
Thaum Neeg Leej Tub raug tsa nyob saum ntoo cuam, kuj zoo ib yam li Mais Xes tsa tus nab tooj nyob teb chaws suab puam. Tej yam no yog qhov koj ntshai, tab sis yog koj saib thaum Neeg Leej Tub raug tsa nyob saum ntoo cuam, nws yuav pub txoj sia nyob mus li rau txhua tus uas ntseeg txog nws.
Saib seb ! Koj pom dab tsi nyob saum tus ntoo cuam ? Nws yog kev tsim txom thiab kev ntshai uas tuaj raug peb, nws yog lub plawv ntawm ntawv Moo Zoo.
Tswv Ntuj txoj kev nyiam kev hlub, Leej Ntshiab Paj Lug hais tias :
“Kev tuag, txoj sia thiab txhua yam muaj txoj sia tsis tuaj yeem cais peb tawm mus ntawm Tswv Ntuj txoj kev nyiam kev hlub.” Vim li cas Paj Lug thiaj hais li ntawd ?
Vim nws pom tias Neeg Leej Tub raug tsa nyob siab, nws saib ntsoov tej yam xwv txheej tuaj raug peb. Qhov ntawd yog tas txhua yam hais ua ntej hauv Zam ntawv Moo Zoo zaj 3 qib 16.
Li ntawd, thaum koj nco txog zaj no, thov koj rov mloog lo lus no ib lwm ntxiv.
“Vim Tswv Ntuj nyiam lub qab ntuj neeg npaum no, nws thiaj muab nws Leej Tub Twm Zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li.”
Tswv Ntuj hais rau nws Leej Tub tias : “Nqes mus, nqes mus hauv txhua yam uas ua rau lawv ntshai. Ua kom lawv pom thiab paub txog txoj kev nyiam kev hlub, thaum lawv nyob hauv kev ntshai.” Ces peb yuav pom tias : yog leej twg nrog Yes Xus dai saum ntoo cuam, nws yuav tau txais kev cawm.
“Lo lus Salus” hauv xeem lus Hes Nplaws yog hais txog kev noj qab haus huv. Txoj kev cawm yog hais txog kev kho mob. Txoj kev ntshai hauv koj lub siab yuav ploj mus tau li cas ? Koj yuav tsis txhob ntshai ntsib los yog ntshai fim koj txoj kev ntshai, koj yuav tab meeg ua. Koj yuav tau txais kev kho kom koj txoj kev ntshai ploj mus nyob hauv fab ntsuj plig. Koj yuav saib Neeg Leej Tub zoo li tus nab nyob teb chaws suab puam, koj yuav saib Neeg Leej Tub thiab koj yuav mloog nws.
Peb yuav ris kev txhaum thiab ris txhua yam kev tsim txom nyob hauv ntiaj teb, ces peb txoj kev ua ntawd yuav ua kom peb yeej kev ntshai. Vim peb paub tias tsis muaj ib yam dab tsi yuav cais tau peb ntawm Tswv Ntuj txoj kev nyiam kev hlub. Tam sim no peb nyob ze lub Lis Piam Ntshiab lawm, peb yuav los xav txog peb txoj kev nyiam kev hlub thiab xav txog Yes Xus txoj kev tuag zoo dua.
Thov Tswv Ntuj foom hmoov zoo rau koj !
