Lub Cheeb Koom Txoos Suav, tau ib tug Tswv Qhia tshiab los ntawm tseem hwv Suav thiab Vas Tis Kas kev sib cog lus.

Yog ib lis piam tom qab uas teeb tsa ib tug Tswv Qhia tshiab los saib xyuas lub Cheeb Koom Txoos Datong hauv lub xeev Shanxi nyob qaum teb.

Ding raug tsa ua Tswv Qhia hnub tim 8 lub 9 hlis, tom qab Vaj Qhia Leo 14 tsa nws ua Tswv Qhia hnub tim 28 lub 7 hli xyoo no. Raws li kev sib cog lus ntawm tseem hwv Suav thiab Vas Tis Kas. Muaj Tswv Qhia Li Shan nyob Pej Ceeb ua tus coj lub Txoos ua cov kab ke tsa Tswv Qhia. Ding yog tus Tswv Qhia tim ob uas raug teeb tsa nyob Suav teb, tom qab ib lis piam ntawm tseem hwv Suav thiab Vas Tis Kas sib cog lus tas. Yog txuas los ntawm kev teeb tsa Tswv Qhia Liu Honggang nyob Datong hnub tim 31 lub 8 hli tag los. Xov xwm tshaj tias ; nws yog cov Tswv Qhia Suav tus tim 18 uas Vas Tis Kas teeb tsa los yog lees txais, txij thaum muaj kev sib cog lus thawj zaug hauv xyoo 2018. Tom qab no kev sib cog lus no raug txuas hnub nyoog los yog ntxiv sij hawm ua 4 xyoos nyob hauv xyoo 2024. Tab txawm tias tsis muaj kev nthuav tawm kom ntxaws rau ib tsoom neeg, tsis kav kev sib cog lus no cuam tshuam txog pab neeg teeb tsa cov Tswv Qhia Kav Tos Liv nyob Suav teb. Kev sib cog lus no lub hom phiaj yog daws teeb meem hauv kev tsis sib haum xeeb los ntev hais txog kev ua hauj lwm ntawm lub Koom Txoos Kav Tos Liv nyob Suav teb, nrog rau kev sib tawg ntawm cov zwm rau tseem hwv Suav thiab cov Kav Tos Liv uas mloog Vas Tis Kas. Txawm li cas kuj xij, kev sib cog lus no tseem ua chaw sib cav uas muaj cov xyav moo txog kev ntxhov siab ntawm kev ntseeg kev thaj yeeb thiab hauv cov Kav Tos Liv zais ntshis. Ua ke ntawd Vas Tis Kas hais txog kev muaj vaj huam sib luag ntawm lub Koom Txoos hauv cov Kav Tos Liv nyob Suav teb. Tswv Qhia Ding yug nyob Chongqing xyoo 1981. Nws mus kawm nyob hauv tsev kawm kev ntseeg txheej siab nyob Pej Ceeb thiab tau txais lub Cim Tiag Tes ua Txiv Plig xyoo 2007. Ntxiv los nws tau kawm fab txuj kev ntseeg nyob Mas Kaus thiab nyob Los Mas, ua ntej yuav mus tshaj Ntuj Lus nyob hauv ntau lub tsev teev Ntuj uas zwm rau lub Cheeb Koom Txoos Chongqing. Kev teeb tsa ntawm nws yog ib kauj ruam hauv kev tsa Tswv Qhia ntawm tseem hwv Suav thiab Vas Tis Kas kev sib cog lus uas muaj ua ntu zus, hais txog kev ua hauj lwm ntawm cov Cheeb Koom Txoos Kav Tos Liv nyob hauv Suav teb.