Ib tug thawj coj cov Yes Xus Is ceeb toom txog kev kub ntxhov hauv kev qaug zog ntawm cov Txiv Plig, nws thov kom rov los cuag Tswv Ntuj

Ib tug thawj coj hauv cov Yes Xus Is tau ceeb toom tias ; kev qaug zog nyob hauv cov Txiv Plig txhab ntxiv ntawd, yog kev kub ntxhov zais ntshis ntawm lub Koom Txoos. Nws thov kom cov Txiv Plig lees txais qhov nws piav tias ; yog kev qaug zog ntshiab, zoo dua nyob twj ywm.

Txiv Plig Miguel uas nws yog tus thawj coj cov Yes Xus Is nyob Thaib teb, tau hais txog cov teeb meem no nyob hauv lub rooj sau siab nruab xyoos ib lis piam ntawm cov Txiv Plig nyob hauv lub Cheeb Koom Txoos Bangkok. Nws pom tias kev qaug zog tsis yog kev piam sij, tab sis yog lub luag hauj lwm fab ntsuj plig uas hu kom rov sawv. Cov kev xav no tshwm sim thaum Vaj Qhia Leo 14 muab lub 4 hlis no teeb ua lub hlis teev Ntuj ntawm cov Txiv Plig uas ntsib teeb meem lub suab hu los yog kev kho siab. Nws thov kom cov neeg ntseeg tso tseg tej kev xav tias ; Txiv Plig yog cov neeg ua hauj lwm, thiab pauv ua kev tig los txhawb nqa fab ntsuj plig thiab lub zog rau lawv. Txiv Plig Miguel hais tias : “Lub qhov txhab tob tshaj nyob hauv cov Txiv Plig tsis yog tshwm sim los ntawm kev piam sij, tab sis yog tshwm sim los ntawm kev nyob ntsiag to ntau dua hauv niaj hnub. Xws li kev ua hauj lwm uas tsis muaj kev lees txais, kev pub uas tsis tau txais kev nkag siab thiab kev ris lub nra uas ntsia tsis pom.”