Cov tub ntxhais hluas muaj qhov tseem ceeb hauv kev tsuj xeeb txwm 100 xyoo, ntawm kev tshaj lub Moo Zoo nyob Thaib teb.

Hauv kev teev Ntuj, kev txhab kev ntseeg, thiab kev tawm mus pab zej zog hauv lub ntsiab lus tias: “Sib koom ua ib tug nyob hauv Yes Xus thiab sib koom ua ib tug hauv kev tshaj lub Moo Zoo.” Nyob hauv lub Cheeb Koom Txoos Surat Thani, cov tub ntxhais hluas tau tuaj sib sau ua ke nyob hauv lub tsev kawm txheej siab Don Bosco Technological thiab lub tsev teev Ntuj hwm Tus Tshiab Las Fais, kom tau ua cov hauj lwm hais txog kev sib koom ua ib lub siab thiab kev ua tus tshaj lub Moo Zoo. Qhov tseem ceeb yog dhos qhov Jigsaw loj uas qhia txog Yes Xus lub neej thiab Yes Xus cov hauj lwm. Yog zoo li ua kom pom tias; sawv daws puav leej muaj feem cuam nyob hauv lub Koom Txoos cov hauj lwm. Txiv Plig Sitthichok Sawankarn hais tias: “Hauv Tswv Ntuj cov hauj lwm, tsis muaj leej twg yog tus tsis tseem ceeb.” Thiab nws kuj hais txog qhov tseem ceeb hauv kev nyiam kev hlub, kev sib koom siab thiab kev sib txhawb nqa. Dhau no lawm, cov tuaj sau siab tseem tau saib kev ua yeeb yam hauv tej kab lis kev cai, kev sib tw kev ntseeg, kev zov lub Cim Yug thiab kev mus saib cov neeg hauv zej zog. Tswv Qhia Trairong Multree thov kom cov neeg ntseeg Kav Tos Liv nkag los muaj feem cuam khov kho hauv kev tshaj lub Moo Zoo.

Ua ke ntawd, pab tus tshaj Ntuj Lus txawv teb chaws ntawm PIME, tau npaj kev teev Ntuj pub rau cov me nyuam pluag txom nyem. Nrog rau cov me nyuam nyob hauv lub Koom Haum Leej Ntshiab Martin nyob ntawm qaum Bangkok. Kev tsuj xeeb xaus rau hnub tim 18 lub 10 hli, hauv lub thaj txi Ntuj ua Tswv Ntuj tsaug. Muaj Tswv Qhia Trairong ua tus coj lub Txoos. Nws tau hais rau cov neeg ntseeg tias: “Tab txawm muaj kev sib txawv nyob hauv tej kab lis kev cai, hauv xeem lus thiab yav dhau los, tsis kav sawv daws puav leej raug hu kom sib koom ua ib tug nyob hauv Leej Pleev, thiab muaj tib txog hauj lwm uas yog tshaj lub Moo Zoo mus rau lub ntuj dav.”