Cov thawj coj tshaj lub Moo Zoo ntawm lub pwm tsav cov Tswv Qhia As Xias los yog FABC hais tias : “Lub Koom Txoos nyob As Xias thov kom ua tus txheeb ze hauv kev cia siab.”
Ua ntej cov lus hauv lub rooj sab laj loj, mas tus thawj tswj lub Koom Haum tshaj Ntuj Lus ntawm FABC hais tias : “Vim muaj ntau yam kev teev hawm thiab kab lis kev cai zoo nyob As Xias, mas thov kom lub Koom Txoos txhawb nqa kev sib tham, kev ua kwv ua tij thiab kev nyob ua ke thaj yeeb.”
Tswv Qhia Poh hais tias : “Dhau ntawm lub rooj sab laj loj zaum no, cov hauj lwm uas Vaj Qhia Fas Ntshis Kus tau pib tseem ua ntxiv mus, kom lub Koom Txoos yog tus choj txuas nrog txhua txoj kev teev hawm, txhua txoj kab lis kev cai thiab txhua haiv neeg nyob As Xias.” Nws hais zaj paj lug txog tus Xas Mas Lias siab zoo. Nws txhib kom cov Kav Tos Liv sib faib lub Moo Zoo hauv kev phooj ywg, kev sib txhawb siab thiab kev ua hauj lwm. Tshwj xeeb tshaj yog ua rau cov raug kev txom nyem, cov taij thov kev ncaj ncees thiab cov raug cais. Tswv Qhia Poh tseem hais txog lub rooj sab laj cov hauj lwm xyoo 2005 ntawm FABC lub Koom Haum tshaj Ntuj Lus nyob Penang, uas txhawb nqa kev tshaj lub Moo Zoo raws As Xias tus yam txwv hauv kev sib tham thiab kev nyob ua ke sib pom dej siab. Thaum xav txog yav tom ntej, nws tshaj tias lub Koom Haum no nrog lub Koom Haum ua hauj lwm rau kev ntseeg thiab kev sib raug zoo. FABC lub Koom Haum kev ntseeg yuav ua tswv cuab npaj lub rooj sab laj hais txog “lub Moo Zoo thiab kab lis kev cai hauv lub neej ntawm cov neeg toj siab” nyob Bangkok hnub tim 2-5 lub 12 hlis xyoo 2026.
Lub rooj sab laj no yuav soj ntsuam kev sib raug zoo ntawm lub Moo Zoo thiab cov neeg toj siab tej kab lis kev cai, nrog rau txhawb nqa kev saib xyuas txhua yam nyob ib puag ncig thiab kev sib tham nrog ib tsoom neeg.
Nws vam tias lub Koom Txoos nyob As Xias yuav muab kev khuv leej thiab Yes Xus txoj kev kho ua kom pom, thiab pab tsim zej zog kom nyob thaj yeeb thiab sib haum xeeb dua qub.
