Caritas Pakistan qhib 5 lub tsev kawm ntawv tsis raws cai nyob Karachi, rau cov me nyuam pluag txom nyem.
Tswv Qhia Benny Travas nyob Karachi qhuas txog Caritas cov hauj lwm tau pab cov me nyuam thiab cov tsev neeg pluag txom nyem uas lawv mus tsis txog tsev kawm ntawv. Tswv Qhia hais tias : “Kev kawm yog thawj yam thiab yog yam twj muaj zog rau kev pauv ntxeev hauv zej zog.” Nws thov kom cov niam cov txiv thiab cov thawj coj zej zog nrog txhawb nqa kev kawm. Nws hais tias kev kawm yuav pab kom cov me nyuam yeej kev pluag txom nyem thiab tsim zej zog kom ruaj khov tau. Cov hauj lwm pib no yog ib feem ntawm lub Koom Haum Caritas. “Kev txhawb nqa kev kawm tsis raws cai rau cov pej xeem raug tso tseg thiab cov tsis muaj caij kawm ntawv nyob Pas Kis Taas teb” ntawm Caritas Pas Kis Taas. Lub hom phiaj yog pab cov me nyuam thiab cov tub ntxhais hluas uas lawv yog neeg pluag txom nyem. Nrog rau cov tub zog, cov me nyuam ntxhais uas raug txwv hauv kev kawm. Mansha Noor uas nws yog tus lwm thawj tswj ntawm Caritas Pakistan Karachi hais tias : “Cov tsev kawm ntawv no yog txoj kev rau cov me nyuam uas kawm txog nrab es lawv tawm, kom tau rov mus kawm ntawv tau.” Cov hauj lwm no ua nyob hauv 3 lub tsev teev Ntuj hauv lub Cheeb Koom Txoos Karachi. Xws li hauv lub tsev teev Ntuj hwm Leej Ntshiab Mis Kas Ees, hauv lub tsev teev Ntuj hwm Leej Ntshiab Yus Dis thiab lub teev Ntuj hwm Leej Ntshiab Tos Mas. Raws li Javed Iqbal tus txuas lus hauv zej zog hais tias : “5 lub tsev kawm ntawv tshiab no, ua rau cov tsev kawm ntawv tsis raws cai los ntawm lub tsev teev Ntuj Mis Kas Ees txhab ntxiv ua 8 lub. Cov tsev kawm ntawv no pub kev kawm rau cov me nyuam uas tsis tuaj yeem mus kawm nyob hauv cov tsev kawm ntawv uas lawv tau kawm yav tag los, thiab npaj kom lawv txoj kev kawm hloov mus raws tseem hwv txoj kev kawm tseeb tiag.”
Hauv cov kab ke qhib tsev kawm ntawv, muaj 150 tus me nyuam tau txais ntau yam xws li ntawv sau, ntawv nyeem, hnab ntim ntawv, hwj rau dej haus, tais ntim mov noj thiab cwj mem. Cov xib hwb qhia ntawv kuj tau txais ntau yam siv hauv chav kawm thiab tej ntaub ntawv qhia cov me nyuam. Shahmeem Khurshed tus thawj tswj lub tsev kawm txheej nrab Leej Ntshiab Patrick’s tshaj tias : “Lub tsev kawm no yuav txo nqi kawm ntawv thiab nqi kawm dhau caij rau cov kawm tau zoo thiab cov tsim nyog hauv thaj tsam tsev teev Ntuj hwm Leej Ntshiab Mis Kas Ees.”
Txiv Plig Barnabas George tus Txiv Plig saib lub tsev teev Ntuj Mis Kas Ees ua tsaug rau lub Koom Txoos, rau lub Koom Haum Caritas thiab cov xib hwb uas txhawb nqa cov hauj lwm no. Thiab nws rov zeem tseeb txog kev muab siab rau ntawm cov tsev teev Ntuj uas pub lub caij raug cov me nyuam pluag txom nyem tau kawm ntawv.
