Hnub tim 11 lub 6 hli 2025 no, Vaj Qhia Les Os 14 rov qhia Ntuj kev cai dua. Hnub no mas Vaj Qhia hais txog Huab Tais Yes Xus txoj hauj lwm cawm neeg ntawm lawv tus mob (healing).
Nyob hauv Mas Kos Ntawv Moo Zoo (MK 10:46-52) piav tias Huab Tais Yes Xus law tuaj txog Yes Lis Kos, muaj ib tug neeg dig muag thov khawv hu ua ‘Npas Tis Mes’ hnov tias Huab Tais Yes Xus tuaj txog ntawd, ces nws hu nrov nrov kom Huab Tais Yes Xus khuv leej nws. Huab Tais Yes Xus hnov nws lub suab hu, mas Huab Tais Yes Xus hais kom nws los ntawm Huab Tais Yes Xus, ces Huab Tais Yes Xus nug saib nws xav kom Huab Tais Yes Xus ua dab tsi rau nws. Tus dig muag Npas Tis Mes thov Huab Tais Yes Xus ua kom nws rov pom kev. Huab Tais Yes Xus hais rau nws tias “Koj mus mog, koj lub siab ntseeg cawm koj lawm.” Tam sim ntawd, Npas Tis Mes rov pom kev, ces nws raws Huab Tais Yes Xus.
Vaj Qhia pib nthuav tias thaj tsam Huab Tais Yes Xus thiab tus dig muag sib ntsib yog ib thaj tsam tseem ceeb, vim tias lub tsheej Yes Lis Kos nyob rau ib thaj tsam qis dua dej hiav txwv, los yog nyob tob dua npoo av. Thaum ntawd, Huab Tais Yes Xus tab tom mus rau lub tsheej Yes Lus Xas Les uas yog lub tsheej ntshiab. Yog li mas cov xwm no thiaj zoo li yog xav qhia txog qhov peb ntseeg tias Huab Tais Yes Xus tuag mus zwm av, nws mus txog ntuj txias teb txaus, kom tau npo cov neeg tuag nyob nruab yeeb sawv rov los.
Tus dig muag lub npe hu ua ‘Npas Tis Mes’ txhais tau tias ‘Tus muaj tsim tus tub.’ Tab sis peb pom tias thaum nws dig muag, mas nws ua neeg thov khawv tsis muaj tsim. Tus dig muag no lub neej thiaj piv tau rau cov neeg poob tsag, tus neeg kob huam, tsis tshuav dab tsi zoo nyob hauv nws lub neej ntxiv.
Tab sis peb kuj pom tias tab txawm Npas Tis Mes dig muag thov khawv, tab txawm tsoom sid cem nws kom ua twj yam, tsis kav nws tseem tsa ncauj thov kev pab tsis tseg. Npas Tis Mes dig muag, tab sis nws pom tseeb dua cov qhov muag pom kev, vim Npas Tis Mes paub tias Huab Tais Yes Xus yog leej twg.
Vaj Qhia ntuas sawv daws kom ras tau tias Huab Tais Yes Xus mloog sawv daws lub suab hu, tsis muaj ib lub suab twg Huab Tais Yes Xus yuav tsis mloog; ib yam li Huab Tais Yes Xus hnov Npas Tis Mas hu txog nws, ces Huab Tais Yes Xus hais kom Npas Tis Mes los cuag nws.
Qhov no kuj yog ib qhov zoo cia peb ua tib zoo xav. Huab Tais Yes Xus tsis mus nrhiav Npas Tis Mas, tab sis hais kom Npas Tis Mes los nrhiav Huab Tais Yes Xus. Npas Tis Mes pov rhees nws lub tsho ntev cia, ces nws mus cuag Huab Tais Yes Xus.
Npas Tis Mes pov rhees lub tsho ntev; lub ntsiab yog nws hle yam npog nws lub cev pov tseg kom nws lub cev tau txais kev cawm ntawm Huab Tais Yes Xus.
Nyob hauv peb kev ua neej, muaj ntau zaus tej yam npog peb lub cev kuj ua chaw khuam peb cia kom txhob tau txais txiaj ntsim ntawm Tswv Ntuj. Yog peb xav tau kev cawm mas peb yuav hle tej yam npog peb cia pov tseg, peb qhib tag nrho peb rau Tswv Ntuj.
Huab Tais Yes Xus nug Npas Tis Mes tias “Koj xav kom kuv ua dab tsi rau koj?”; ces Npas Tis Mes teb tias “Kuv thov kom kuv qhov muag rov pom kev.” Npas Tis Mes lo lus no tsis yog kom nws ntsia pom xwb, nws tseem xav tau txais nws lub tsim lub sab xeeb rov thiab.
Vaj Qhia hais ntxiv tias peb txhua tus tau txais kev cawm vim peb lub siab ntseeg zoo li Npas Tis Mes uas nws lub siab ntseeg rov cawm nws. Huab Tais Yes Xus kho peb kom peb ua neeg twj lij. Txawm tias Huab Tais Yes Xus tsis tau hu Npas Tis Mes los raws nws, tsis kav Npas Tis Mes zoo siab raws Huab Tais Yes Xus mus, vim nws paub tias Huab Tais Yes Xus yog Txoj Kev.
Li ntawd, Vaj Qhia Les Os 14 thiaj caw tsoom neeg ntseeg sawv daws kom lawv tso siab nthi tso lawv kev tsis muaj zog, lwm tus neeg kev qaug zog thiab cov neeg raug txom nyem tej kev mob rau ntawm Huab Tais Yes Xus xub ntiag. Thiab koom nrog lawv hu Huab Tais Yes Xus tias “Huab Tais, thov koj mloog peb thiab nres saib peb mas.”
