Srettha Thavisin ua thawj pwm tsav, thiab hnub uas Thaksin Shinawat rov qab los Thaib teb

Hnub uas Thaksin Shinawat rov qab los Thaib teb, tom qab nws khiav tawm teb chaws mus tsiv nraim ntev li 17 xyoo nyob txawv teb chaws. Srettha Thavisin hauv pab nom Pheua Thai raug xaiv los ua thawj pwm tsav. Xyoo 2006 cov tub rog txeeb kav teb chaws, ces Thaksin thiaj li tau tawm khiav teb chaws. Thaksin uas yav tag los nws yog tus thawj coj ntawm pab hnav tsho liab, tam sim no nws muaj 74 xyoos, nws rov qab los txais lub txim nyob Thaib teb. Lub tuam tsev txiav txim nyob Klong Prem txiav txim muab Thaksin kaw nkuaj 8 xyoo, vim nws nyiag noj lub teb chaws tej nyiaj txiag. Tom qab Thaksin caij dav hlau los txog Thaib teb, mas nws npaj ib tsab ntawv txo txim yuav mus ntsib tus vaj Thaib tim 10, thiab nws vam tias yuav tau txais kev txhawb nqa los ntawm pab nom tshiab uas muaj Srettha Thavisin ua tus coj thiab ntseeg siab. Tab sis tej yam ntawd pom tias mus tsis tau, vim Thaksin lub txim loj dhau lawm. 

Kev xaiv tsa nyob Thaib teb muaj tshwm sim los ob zaug, muaj pab nom Pheua Thai thiab cov tub rog los sib tw txiav kev vam meej txog yav tom ntej. Pab nom uas yeej kev xaiv tsa nyob hauv hnub tim 14 lub 5 hli xyoo 2023 no, yog pab Kao Krai uas muaj yawg Pitha Limcharoenrat uas tus coj. Tab sis nws raug liam txim tias yuav rhuav txoj cai thiab thuam vaj ntxwv Thaib. Kev thuam vaj ntxwv Thaib teb, mas yuav raug lub txim kaw nkuaj 15 xyoos, ces Pitha thiaj tsis tau ua thawj pwm tsav. Qhov kawg thiaj poob rau pab nom tau suab tim ob, uas yog pab Pheua Thai. Lawv cog phooj ywg nrog 11 pab nom nyob hauv lub pwm tsav, ces tus thawj pwm tsav thiaj poob los rau yawg Srettha Thavisin. Vam tias Thaib teb yuav dim ntawm txoj kev kub ntxhov no mus.