As Mes Lis Kas pab tub ncaws pob tawb, txeeb tau lub txiaj kub ntawm kev sib tw King’s Cup nyob Thaib teb
Hnub tim 9-16 lub 7 hli xyoo no, As Mes Lis Kas pab tub ncaws pob tawb tau tuaj koom kev sib tw ncaws pob tawb King’s Cup zaum tim 36 nyob hauv lub nroog Korat nyob Thaib teb. As Mes Lis Kas pab tub ncaws pob tawb muaj 5 leeg, lawv kev sib tw tau sib npaug 3-3 thiab 4-4, lawv tsis swb ib pab twg li, ces lawv tau txais 2 lub txiaj kub.
As Mes Lis Kas pab tub ncaws pob tawb, muaj 3 tug yog Hmoob thiab 2 tug yog neeg Karen. Lub ntim kub ntawm kev sib tw nruab xyoos xyoo no, yog ua los pub rau tus vaj ntxwv Thaib thiab yog kev sib tw ncaws pob tawb uas nto npe tshaj.
Mirken uas yog tus thawj coj As Mes Lis Kas pab tub ncaws pob tawb hais tias : muaj ib qho tsis zoo, yog qhov tias txhua zaus peb tuaj, peb coj pab tshiab tas li. Peb sau tas cov tub ncaws pob tawb nyob thoob As Mes Lis Kas teb cov uas ncaws tau zoo tuaj xwb.
Mirken hais ntxiv tias : “Nws siv sij hawm ntev nyob hauv kev txhim kho thiab kev sib ntseeg siab, kom sawv daws tau koom ua ib pab tiag tiag. Yus yuav tau ntseeg siab tias txhua tus tub ncaws pob tawb lawv siv zog tiag thiab lawv ua lawv tus yam ntxwv tseeb tawm los. Txhua tus tub ncaws pob tawb yuav tsum nyob hauv nws txoj cai kav lawv.”
Pob tawb yog ib hom kev ua si uas nyuab thiab tsis yooj yim, yog tias yus tsis txawj. Vim kev ncaws pob tawb nws tsis zoo li kev ntaus pob uas xuas ntes ntaus, nws yog siv ko taw, hauv caug thiab taub hau xwb.
Kev sib tw nyob Thaib teb, As Mes Lis Kas pab tub ncaws pob tawb yeej ntau lub teb chaws xws li ; Pakista, Saudi Arabia, Fab Kis, Oman, Switzerland, Bangladesh, Nepal thiab Iran. Mirken vam tias lwm xyoo As Mes Lis Kas pab tub ncaws pob tawb yuav tau nce ua pab tim 1 thiab zoo tshaj plaws nyob Thaib teb. Thiab nws vam tias yuav tau txais peev nyiaj txiag los txhim kho thiab xyaum cov tub ncaws pob tawb ntxiv mus, thiab tsim tej qhov chaw xyaum ncaws pob tawb pub dawb.
